Mawkyrwat, K’lyngkot 06
Ka Executive Committee jong ka Hima Nobosohphoh lem bad ka Synjuk ki Nongsynshar Shnong ha ryngkat ka jingdonlang u Acting Syiem, Bah Ferdinand Syiemïong lem ka jingsakhi lang u Block Development Officer jong ka Mawkyrwat C&RD Block, Bah I Lawriniang ha ka 6 tarik u Kyllalyngkot 2025 ki la plie jubor da kaba ot ïa ka tala ka ophis treikam jong ka Hima Nobosohphoh kaba don ha ka shnong Rangblang, South West Khasi Hills District.
Katkum ka jingïathuh u Acting Syiem, Bah Ferdinand Syiemïong, u la ong ka jingot ïa ka tala jong ka ophis ka dei hadien ba u Syiem barim u Kawangbor Syiemïong um shym la wan ban aiti ïa ki kot ki sla kumjuh ruh ïa u shabi ophis hadien ba ka KHADC ka la pynsangeh ïa ka jingtreikam jong u na ka kam Hima bad ka la thung noh ïa u Ferdinand Syiemïong kum u Acting Syiem ban pynïaid shipor ïa ka synshar khadar hapoh ka hima.
Shuh shuh u Acting Syiem u la ïathuh ruh ba u la dep ban phah da ka shithi sha u Syiem barim ban wan aiti noh ïa u shabi hapoh ka 26 tarik u Nohprah 2024 hynrei um shym la sngap ne burom ïa katei ka shithi ruh.
U Acting Syiem ha kawei ka liang, u la ai khublei ruh ïa ki matti u Syiem Kawangbor Syiemïong bad u la pynpaw ba um don kano-kano ka jingkynnoh ïa u Syiem. U la ai khublei ruh ïa ki bor distrik kiba la shimkhia ïa kane ka kam da kaba phah ïa u majistor ha ryngkat ka jingdonlang u Lyngdoh, ki Sordar Shnong bapher bapher ryngkat ki khun ki hajar ka Hima Nobosohphoh ban sakhi ïa ka jingplie ïa ka ophis. Kumta na ka liang u Acting Syiem u khot bad wer ruh ïa baroh ki Sordar Shnong, ki khun ki hajar ba kin ïatreilang nangne shakhmat na ka bynta ban wanrah ïa ka bha ka miat jong ka Hima.
Ha katei ka sngi ka la don ruh ka jingpynkup burom ïa u Acting Syiem da ka ïing Sad ïing Sunon jong ka Hima Nobosohphoh.
