Shillong K’lyngkot 06
Ki nongthep vote ha jylla Meghalaya baroh kawei ki don haduh 22,69,512 ngut kat haduh ka 6 tarik mynta u Kyllalyngkot 2025. Napdeng kine, kiba 18-19 snem ka rta ki don 72,941 ngut, kiba 85 snem shaneng ki don 10,398 ngut bad kiba duna dkhot met ki don 11,960 ngut.
Kane ka long katkum ba la pyni ha ka thup kyrteng ki nongthep vote kaba la pynbna paidbah da u Chief Electoral Officer ka Jylla, Dr. B.D.R Tiwari ha ka Lah Sngi U Blei.
Haba ïanujor ïa ka jingdon ki nongthep ‘vote’ ha u Kyllalyngkot 2024 ka long 22,17,100 ngut bad mynta u Kyllalyngkot 2025 ki don 22,69,512 ngut. Kumta ka jingdon ki nongthep vote ka la kiew da 52,412 ngut katkum ka final electoral roll jong mynta u snem 2025.
Napdeng 22,69,512 ki nongthep vote, 11,18,907 ngut ki dei ki shynrang bad 11,50,599 ngut ki kynthei katba 6 ngut ki Third Gender.
U Dr. B.D.R Tiwari u la pynbna ba la pyndep ïa ka Special Summary Revision ha ka 1 tarik u Kyllalyngkot 2025. La pyndep ïa kane ka kam da kaba khmih bniah bin-pa-bin ban pynthikna ba kan don ka jingpynbeit ryntih bad yn kynthup lang ïa baroh ha ka thup kyrteng thep vote (electoral roll).
U Dr. Tiwari u la batai ruh shaphang ka jingïaid ha ki ar rukom ïa ka jingpynthymmai ïa ka thup kyrteng jong ki nongthep vote ha kane ka jylla.
U la ong ruh ba ka don ka jingleit pynthikna ha man la ki longïing, ki jaka thep vote ban pynbeit ïa kino-kino ki jingbakla ne jingduna khnang ba ka thup kyrteng thep vote kan long kaba janai.
U la ïathuh ban pynbiang ïa ka jingdonkam ki paidbah, la pynmih shuh ïa ki jaka thep vote na ka 3,512 ha u snem 2024 sha ka 3,551 tylli mynta u snem 2025 bad ka jylla ka la lah ruh ban pynurlong 100 na ka 100 ïa ka jingai ïa ki EPIC sha baroh ki nongthep vote.
Shuh shuh u Dr. Tiwari u la ïaroh ïa ka jingshimkhia jong baroh ki seng saiñ pyrthei bad ki nongshong shnong ha kaba pynthikna ïa ka jingïaid beit ha ka jingpynrung kyrteng ïa ki nongthep vote bad pynbeit thymmai ïa ka thup kyrteng.
