Shillong, K’lyngkot 07
Ka Sorkar Jylla ka la pynpaw ba ka jingkhang ka dang plie na ka bynta ka Hynñiewtrep National Liberation Council (HNLC) ban ïakren ïasuk ha kano-kano ka por wat hadien ba kane ka seng ka la kynrandien noh na ka jingïakren kaba la sdang ha u snem 2022.
U Chief Secretary ka jylla, Bah DP Wahlang ha ka Sngi Ba-ar u la ong ba wat la ka la don ka jingdkut noh jong ka jingïakren hapdeng ka HNLC bad ki ar Sorkar, hynrei ka jingkhang haduh mynta ka dang plie na ka bynta ka jingïakren ïasuk.
U la ong ba ka la don ka por ba ki Nongïalam ka HNLC ki la pynpaw ïa ka jingthrang ban ïakren ïasuk, hynrei ki don ki mat ba kham kyllaiñ ba la buh na ka liang ka seng, kiba pynlong ban khlem poi sha ka jingïasngewthuh.
“Ngi la kyrpad ïa ki ba kin leit phai sha ki jaka jong ki ban pynbeit bad ïasyllok, bad hadien ba ki la shai bad poi ha kajuh ka jingmut ngin sa bteng biang ïa ka jingïakren”, la ïathuh u Bah Wahlang.
Une u heh ophisar ka Jylla u la ïathuh ruh ba hadien ba ki la leit kim shym la wanphai shuh ban bteng ïa ka jingïakren bad ka Sorkar. “Ngi dang ap ïa ki, ka jingkhang jong ngi ka dang plie bad kata ka long kaba donkam”, la bynrap une u heh ophisar.
U Chief Secretary u la pynpaw ba ka Sorkar Jylla ka long kaba kloi ban ïakren, hynrei ki don katto-katne ki mat kiba ym lah ban pynbeit, namar ba hap ban sngewthuh ba ka Ministry of Home Affairs jong ka Sorkar Pdeng ruh ka don bynta ha kane ka kam.
“Ki don ki mat kiba ym lah ban pynbeit ban poi sha ka jingïasngewthuh jingmut bad ki don ruh kiba lah ban pynbeit ha ka jingïakren. Hynrei ha kaba ïadei bad ki mat kiba ym lah ban pynbeit lang ngim lah ban ïapeiñ, namar ngi sngewthuh ba ka MHA ruh ka don bynta lang hangne”, la ong u Bah Wahlang.
Lah ban kdew hangne ba 5 ngut ki dkhot ka HNLC ki la wan poi sha Shillong ha u Nailar 2022 ban sdang ïa ka jingïakren ïasuk hadien ba ka seng ka ïoh ïa ka jubab na ka Sorkar ba ka la pdiang ïa ka jingtyrwa ïakren ïasuk. Ha kane ka jingïakren ïasuk, u Bah Peter Dkhar (IAS) ba la shongthait u la long kum u Ksiang na ka liang ka Sorkar Jylla, u A.K Mishra, Advisor (MHA, Northeast) u la mihkhmat ïa ka Ministry of Home Affairs (MHA), bad ka HNLC pat ka la thung ïa u Bah Sadon K. Blah, President ka HNYF kum u Ksiang ban pynïaid shakhmat ïa ka jingïakren. Hynrei hadien kumba shisnem tam ba la sdang ïa ka jingïakren, ka HNLC ha u Kyllalyngkot 2024 ka la pynbna ba ka la pynkut noh ïa ka jingïakren halor ka nongrim ba ka Sorkar ka khlem lah ban pynurlong ïa ki mat jingdawa ka seng.
