Shillong, K’lyngkot 07
U Vice President ka United Democratic Party (UDP), Bah Robertjune Kharjahrin, u la ong ba ka jingbym treh shuh jong ar ngut ki MLA barim ban ïakhun na ka UDP ha kane ka ilekshon MDC kan ym ktah ïa ka seng namar kin ïakhun kum ki kyrtong shimet.
U la ong ba ka jingbym treh shuh jong kine ar ngut ki MLA barim, kita u Bah Process T Sawkmie na Mawlai Konstitwensi bad Bah Lambor Malngiang na Nongkrem Konstitwensi kan ym ktah ïa ka UDP ne kan ym pynmyntoi ïa kiwei ki seng.
Nalor kane, u la kyntu ïa ki paidbah ba ki dei ban husiar ban jied ïa kiwei ki seng saiñpyrthei kiba thmu ban pynduh jait ïa ka Sixth Schedule da kaba thmu ban wanrah ïa ka Article 371.
U la ong ba ka UDP kan leit sha u paidbah ha kane ka ilekshon MDC sha KHADC bad JHADC ban pynkhlaiñ ïa ka jaidbynriew khamtam haba ka Sorkar India kan wanrah ïa ka jingpynkylla ha ka khyrnit kaba hynriew namar kin don ki bun ki kyndon kiba ktah matïong ïa ka jaidbynriew.
Kumta u la kyntu ïa ki paidbah ba ha kane ka ilekshon MDC ki dei ban kiar ban jied ïa ki seng ki bym skhem nongrim namar ha jaka ban pynkhlaiñ ïa ka khyrnit kaba hynriew hynrei kin pynduh namar kin wanrah da ka Article 371.
Ha kane ka ilekshon MDC kan ïapher na ka ilekshon MP namar ki don ki konstitwensi ba ka UDP ka khlaiñ, ha kawei pat ka konstitwensi ka khlaiñ ka NPP, Congress, VPP bad kiwei de.
Namar kata, u don jingkyrmen ba ka UDP kan jop bun ngut ki MDC ha KHADC bad JHADC namar ki paidbah ki kham stad ban jied ïa ki nongmihkhmat.
