Shillong, Naitung 09
U Myntri Rangbah ka Jylla, u Conrad K. Sangma ha ka Sngi Palei u la khmih bniah ïa ka kam ba ïadei bad ka jingpynbha ïa ka Baghmara Civil Hospital ha South Garo Hills bad bthah ïa ki ophisar ban pynkloi ne ‘Fast-Track’ ïa baroh ki kam ban pyntikna ïa ka jingai jingsumar kaba kham bha ha kane ka thaiñ.
Ha ryngkat ka jingsynran lang u Additional Chief Secretary ka koit ka khiah, u Sampath Kumar, Deputy Commissioner ka South Garo Hills bad ki heh ophisar ka koit ka khiah, u Myntri Rangbah ka Jylla u la khmih bniah ïa ki projek pynroi bad ka jingai jingshakri ha kane ka jaka sumar.
Ka ‘hospital’ ka la pyni ïa ka jingkiew kaba paw ha kine ki bnai ba la dep. Ka ‘Operation Theatre’ jong ka, kaba la pyntreikam ha u snem 2025, ka la ïaid shakhmat bad 85 tylli ki jingsumar haduh mynta, kynthup ïa 42 tylli ki jingsumar pynkha khun ‘Caesarean Section’.
Ha u snem 2025, kane ka jaka sumar ka la ai jingsumar ïa 20,108 ngut ki nongpang ba wan phah sumar bad pdiang ïa ki 2,334 ngut ki nongpang ba sah. Tang ha ki hynriew bnai kiba nyngkong jong u snem 2026, ka jingdon ki nongpang kiba wan phah sumar ka la palat ïa ka 10,143 ngut.
Ha kajuh ka por, 4 tylli ki kam kiba heh kiba shongdor kumba T.11.37 klur ki dang ïaid shakhmat.
Ka jingpynbha ïa ka ïingmala CHC ka barim, kaba don mynta ïa ka OPD kaba la pynthymmai, ka la dep haduh 85%.
Ka top um kaba thymmai kaba la shna da ka PHE ka la dep 70% ha ka jinglut kaba T.0.77 klur.
Ka jingpynbha ïa 25 tylli ki jaka sah na ka bynta ki nongtrei ka dang ïaid shakhmat bad la mynjur T.3.40 klur, katba ka jingkhot ‘tender’ ïa ka kylla ba-ar ka dang ïaid shakhmat ban pynheh ïa ka ‘Hospital sha ka 70 jingthiah ha ka dor kaba T.4.20 klur.
Hadien ka jingleit jngoh jong u ACS ka tnad ka koit ka khiah ha ka 22 tarik u Jylliew, la kynthup shuh sa katto-katne ki jaka thymmai ha ryngkat ka jingkyrshan ka Sorkar Pdeng.
Kine ki kynthup ïa ka ‘Neonatal ICU’, ka jaka kynshew snam ka ban pyntreikam ha la ki jong ki kylla, bad ka ‘Transit Home’ ba la pynheh da kaba pyndonkam ïa ki jingtei ba la shna lypa ban pdiang ïa 10-15 ngut ki longkmie.
Kumjuh, ka ïing ap ba pura na bynta kiba kha khun ruh ka dang don hapdeng ka jingpynkhreh.
La thmu ruh ban shna ïa ka ‘Mother & Child Health Wing’ kaba don 50 tylli ki jingthiah.
Ka jingkhmih bniah ka la kynthup ruh ïa ka jingtyrwa ban kyntiew ïa ka Chokpot CHC sha ka First Referral Unit ryngkat bad ki jingshakri CEmONC, ka jaka buh snam, bad kiwei-kiwei.
Halor ka jingdon ki nongtrei, u Myntri Rangbah u la bthah ba dei ban pynsted ïa ka jingthung kam ïa ki doktor ba la pyntbit kyrpang.
Na ka liang ka District Health Society ka la dep ban pynmih ïa ka jingpynbna haba ïadei bad ka kam ‘Gynaecologist’ bad ‘Paediatrician’, bad ka jingpyrshang ka dang ïaid shakhmat ban pynkhlaiñ ïa ki nongtrei nos bad ki nongsumar ‘Paramedical’.
“Kine ki kam ki dei ban kylla sha ka jingsumar kaba lah ban shaniah, kaba bha na ka bynta ki paidbah ka South Garo Hills,” ong u Sangma, da kaba bthah ïa ka tnad ka Koit ka Khiah ban buddien ïa baroh ki projek (da kaba buh hakhmat eh) bad ban aiti ïa ki kaiphod halor ka jingïaid shakhmat jong ki kam ki jam na ka por sha ka por.
