Jowai, Naitung 09
Ka khubor ban pynneh ïa ka jingkhuid ka sor Jowai bad ban ym ap ïa kiwei hynrei ban sdang na lade, ka la long ka phang kaba khring bha ïa ka jingmut jong ki paidbah lyngba kawei na ki 13 tylli ki ‘Rot’ kiba la pyni paidbah ha pung Aitnar ha ka sngi pynkut jong ka lehniam Behdienkhlam ha ka Sngi Palei.
U ‘Rot’ jong ka Dorbar Shnong Umshangiar u la pynpaw ba ym dei ka jingbym don ka jingthmu ne ka jingbym biang ka jingpynïaid kaba pynjaboh ïa ka sor, hynrei dei ki jaboh kiba ngi hi ngi pynbun man ka sngi.
Ka la kyntu ruh ïa ki paidbah ba kin ym ap ïa kiwei ban pynkylla ïa ka sor, hynrei ba ka jingkitkhlieh paidbah bad ka jingkhuid ka sdang na uwei-pa-uwei.
Nalor u ‘Rot’ jong ka Dorbar Shnong Umshangiar ba la pynsngew ïa ka khubor ban pynneh ïa ka jingkhuid ka sor Jowai, da kaba ong ba ka jingkitkhlieh ban sumar ïa ka mariang ka sdang na uwei-pa-uwei.
Katba ka Seiñtyllilang Niamtre Ladthadlaboh ka la kyntu ïa ki samla ban kiar na ka jingdih kyiad, bad ka Ïawmusiang ka la pynshai jingmut halor ka jingim kaba koit ba khiah lyngba ka jingri bha ïa ka met, ka jingmut bad ka mynsiem.
Ka jinglehniam ha ka sngi pynkut, ka sdang da ka ‘Kynting Khnong’ ha ïingsah ka Lyngdoh bud sa ka ‘Bam Tyngkong’ bad hadien la pyndep ïa ka lehniam ‘Choh Thyndai’ kaba katkum ka jingngeit ka long ban beh ïa ki ksuid ki khrei, ka pang ka shitom bad ka sniew ka syar na ïing na sem.
Ïa ka jinglehniam la pyndep da ki shakri niam naduh u Dolloi, ki Sangot, u Chutia nalor u Pator, u Langdoh, ka Langdoh bad kiwei-kiwei ki shakri niam ka Raij.
Katba ha ka nohphai sngi la pyndep ïa ka bynta ba kongsan jong ka lehniam Behdienkhlam kaba long ka pung ktieh kyntang bad hangne ki shakri niam hapoh ka jingïalam u Pator ki la pynlong ïa ka nguh ka dem ha ka Syiem Aitnar bad pynbud sa ka jingwanrah ïa ka Khnong Blai ha kaba ki khun ka Niamtre ki la hiar ban shad ha pung kyntang. Hadien ba ka wanrah lut baroh ki rot la pynhiar ïa ka ‘Khnong Blai’.
Hadien ka jingshad bad pyni paidbah ïa ki rot ha pung Aitnar ka la don sa ka lehniam ‘Datlawakor’ hapdeng ka kynhun u Langdoh na Pynthor wah bad ka kynhun u Sangot Paswet na ka Pynthor Nein.
Ha kane ka jingïakop kaba neh 8 minit 45 second, ka kynhun u Langdoh ka la jop pyrshah ïa ka kynhun u Sangot Paswet bad la ngeit ba ka rep ka riang kan bha sha pynthor Wah ban sha pynthor Nein.
Ha kane ka sngi, da ki hajar ngut ki paidbah bad ki nongwan jngohkai na kylleng ka Jylla bad shabar Jylla ki la tuid sha ka pung Aitnar ban sakhi ïa ka sngi pynkut jong ka Behdienkhlam, kawei na ki lehniam tynrai ba khraw tam jong ka jaidbynriew Pnar.
