Shillong, Naitung 09
Ka Hill State People’s Democratic Party (HSPDP) ha ka sngi Palei ka la ai khublei ïa ka Sorkar Jylla bad u Myntri Rangbah u Conrad K Sangma, namar ka jingsdang ïa ka wat ba-ar jong ka jingpynbeit ka jingïakajia pud hapdeng ka Meghalaya bad Assam, kaba la sahteng la slem bha.
U Bah KP Pangniang, President ka HSPDP, u la ong ba ka party kaba don lang ha ka Sorkar MDA na ka por sha ka por, ka la ïai pynbor ïa ka Sorkar ban pynbeit noh ïa u pud u sam bad ka ju ïai pynpaw ïa ka jingkyrmen ba ka wat kaba ar jong ka jingïakren kan sdang noh.
“Ka HSPDP, ka ai khublei ïa ka Sorkar bad u Myntri Rangbah ka Jylla u Conrad K Sangma, uba la shim ïa sienjam ban pynbeit noh ïa u pud u sam bad ka Assam. Mynta ngi la ïaid sha ka wat kaba ar jong ka jingpynbeit pud,” ong u Bah KP Pangniang.
U Bah Pangniang u la pdiang sngewbha ïa ki kyndon ïakren lane ki terms of refererence ba la mynjur lang da baroh ar tylli ki Jylla, kiba la pynshong nongrim ha ki 5 tylli ki nongrim ba kongsan, ka jingpynbeit kan long katkum ka histori, ki jaitbynriew kiba shong shnong ha ka thaiñ, ka jingsngew jong ki briew kiba sah ha ka thaiñ bad ka jingsuk ha ka liang ka synshar khadar.
Da kaba don kine ki nongrim, kan kham suk ban pynbeit ïa ki hynriew tylli ki sector kiba dangsah. Kum u dkhot jong ka West Khasi Hills Regional Committee, u Bah Pangniang u la ong ba u kyrmen ba kane ka komiti, hapoh ka jingïalam u Bah Metbah Lyngdoh, Chairman, kan sa pynlong noh ïa ka jingïakren bad ka Regional Committee Kmarup District, ka jylla Assam.
“Ha West Khasi Hills, ngi don ïa ka bynta jong ka Langpih, kaba dei kawei na ki bynta kaba eh bha. Hynrei da kaba pyntreikam ïa ki 5 tylli ki nongrim ba kongsan, ngi kyrmen ba ki paidbah kin ïatreilang bad ka Sorkar. Ki paidbah ka thaiñ kidei ban ïoh ïa ka lad ban pynpaw ïa ki jingdawa jong ki, bad baroh ar tylli ki Regional Committee, kidei ban bishar bniah ïa ki shuwa ban shim ïa ka rai kaba khatduh,” u la ong.
Ïa ka bynta ba nyngkong jong ka jingpynbeit pud kaba kynthup ïa 6 tylli na ki 12 tylli ki jaka ba don jingïakynad, la pynkut da ka MoU ba la ïasoi ha u snem 2022.
