Shillong, Naitung 09
Kum shibynta ban kyrkhu kyrdoh bad buh jingdwai na ka bynta ka jingleit ïa shimbynta u Samla Kitkupar Nongsiej sha ka jingïakop rwai baheh duh ha ka pyrthei, ka Don Bosco Youth Centre ka la pynlong ïa ka jingbuh jingdwai kyrpang ba un lah ban wanrah nam ïa ka Jylla bad ka Ri hi baroh kawei.
Ban tip khyndiat shaphang u Samla Kitkupar Nongsiej, u dei u khun baheh duh jong u Bah Aibanri Kupar Syiemlieh bad ka Kong Lanosha Nongsiej ba shong ba sah ha ka shnong Kynshi, Eastern West Khasi Hills District, u la jop ïa bun ki jingïakop rwai baheh kiba la long ha ka Jylla ba kynthup ïa ka “Voice Hunt” ba la pynïaid da ka West bad South West Khasi Hills District, ka “Ka Sur Kynud Niam” Season-3 ba la pynïaid da ka Don Bosco Youth Centre bad kiwei.
U Samla Kitkupar, un mih na Shillong ha ka 10 tarik Naitung 2026 ban leit sha ka jingïakop rwai ha ka World Championship of Performing Arts (WCOPA) 2026 ka ban sa long ha Las Vegas, Nevada, United States of America (USA) ka ban sdang naduh ka 13 haduh ka 21 tarik Naitung ïa kaba yn synran da u kpa jong u Bah Aibanri Kupar Syiemlieh.
La ong ba u Samla Kitkupar u la dei ban leit sha USA naduh u snem ba la dep, hynrei namar ka jingbym ïaid beit ki kam ha ka pyrthei na ka daw ki jingïakynad hapdeng ki Ri, la pynkynriah noh ïa katei ka jingïakop sha u Naitung mynta u snem bad un mihkhmat ïa ka India hapdeng ki 60 tylli ki Ri jong ka pyrthei.
Haba ïoh ban ïakren ïa u Samla Kitkupar u la ïathuh ba u sdang nyngkong ban rwai na ïingmane ha ka por ba u dang 6 snem ka rta, hynrei lyngba ka jingkyrshan u kpa jong u, u la ïohlad ban ïashimbynta bad jop ha ki jingïakop rwai kiba khamheh kiba long ha ka thaiñ.
Shuh-shuh u la ong ba ka jingïohlad jong u ban leit ïa shimbynta sha ka World Championship of Performing Arts (WCOPA) 2026 ka dei lyngba ka jingjop jong u ha “Ka Sur Kynud Niam”.
Haba ïadei ka jingpynkhreh u la ïathuh ba u la pynkhreh bha namar ka jingïakop rwai ruh kam dei shuh kaba suk bad ïa ka jingrwai ruh hap rwai tang shi minit thik, u la ïathuh ba u jied saw tylli ki kyrdan (Category) ban rwai bad kaba donkam ka long ban jop ha baroh ki kyrdan.
Haba ïadei ka jingbishar ïa kiba tbit ban rwai u la ïathuh ba ka jingbishar kan dei beit thik na ka sap rwai u nongïashimbynta bad ka jingbishar kan long beit thik tang na ki nongbishar (Judges) ba la buh bad kan ym don kano-kano ka jingkyrshan lyngba ki Vote.
Ha ka jingïalang kitbok kitrwiang ïa u Samla Kitkupar la pynïaid da u Director ka Don Bosco Youth Centre, u Rev. Fr. Michael Makri, katba u Shillong Salesian Provincial, u Rev. Fr. John Zosiama, u la long kum u kongsan bad ha kane ka jingïalang la don ruh ka jingduwai plie, ka jingpule na ka Bible bad ka jingduwai na u Rev. A.I. Kharshiing.
