Mairang, Naitung 09
Ka Ophis treikam jong u Range Forest Officer, Mairang Range, ha ka Sngi Palei jong ka taïew ka la pynlong ïa ki ar tylli ki jingkhynra kiba heh ha Eastern West Khasi Hills District ban khanglad ïa ka jingpyntreikam be-aiñ ïa ki mar kum ki dieng bad shyiap ba la ïoh na ka mariang khlem da ïoh jingbit kiba la pyntrei bad pynïaid ïew hapoh ka distrik.
Ka tnad ba dei peit ïa ki kam khlaw ka la pynlong ïa ka jingkhynra kynsan ha ka 8 tarik u Naitung 2026 ïa ki karkhana ot dieng ha ka thaiñ sor jong ka Mairang ryngkat ka jingïatreilang bad ka tnad pulit jong ka distrik.
Ïa kane ka jingkhynra la pynlong hadien ka khubor ba la jyllei ka jingkhaïi bad shalan dieng bad ki jingujor ba la ïoh na ki kynhun bapher-bapher. Ha kane ka jingkhynra, la lap ba katto-katne ki karkhana ot dieng ki treikam khlem ka jingbit ne ki kot ki sla kiba biang na ka bor ba dei peit.
La kurup ïa ki dieng kiba bun bha bad ïa ki mashin kiba heh kiba pyndonkam ha ki karkhana ot dieng la pyndait tala bad tah mohor da ka tnat Khlaw kum ka dak ba kine ki karkhana la khang khyrdep
Shuh shuh la ong ba shuwa ïa kane, naduh ka 15 tarik Jymmang 2026 ter-ter, ka Ophis jong ka Range ha ryngkat ki bor synshar distrik ki la pynlong ruh ïa ka ‘raid-cum-inspection’ halor ka jingtih shyiap be-aiñ ha ki bynta ka Mairang.
La ong ruh ba ïa kane ka jingjurip la pynlong hadien ka jingujor na ki khlieh nongsynshar bad ki kynhun bapher-bapher ha kaba ïadei bad ka jingkhaïi be-aiñ ïa u shyiap khlem da ïoh jingbit hapoh ka distrik.
Shuh shuh la ong ruh ba ha kane ka jingjurip, la lap ba ki don katto-katne ki jaka tih shyiap kiba pyntreikam khlem ka jingbit na ki bor ba dei khmih bad la pynsangeh noh mardor ïa ki par shyiap be-aiñ bad la kurup noh ïa ki tiar ba pyndonkam ban tih shyiap bad la kurup ruh ïa u shyiap ba la dep ban lumthup ha ka por ba pynlong ïa ka jingjurip.
U Range Forest Officer, u Bah B. M. Kharkongor u la pyntip ba ïa kum kine ki jingkhynra bad jurip la ju leh na ka por sha ka por, bad yn dang ïai bteng ban leh nangne shakhmat ban tehlakam bad khanglad ïa ka jingpyntrei dieng bad tih shyiap be-aiñ hapoh ka distrik.
U la pynshai ruh ba ka tnad kam pyrshah ïa ka khaïi dieng ne shyiap, hynrei baroh ki kam ki dei ban long katkum ki kyndon aiñ ba la buh da ka Sorkar.
U la bynrap ruh ba ki dieng bad u shyiap ki dei ki marpoh khyndew kiba kongsan na ka bynta ka khaïi pateng hapoh ka distrik bad ka tnad ka tip bha ïa kane.
U Bah Lashanbanjop L. Mawlong Forester-I, bad u Bah L. Marthong, MCS, ki la kyntu ïa ki paidbah nongshong shnong ba kin ïatreilang bad ka tnad Forest bad ki bor pynïaid distrik khnang ban pyntikna ïa ka roi ka par kaba bha bad kaba ïahap ha ka distrik.
U Range Forest Officer u la pynpaw ruh ïa ka jingsngewnguh ïa ka Local Timber Association ha ka thaiñ bad ki paidbah kiba la ai ka jingkyrshan ha ka por ba pyntreikam bad kiba la pynthikna ba kum kine ki kam yn pyntrei tang ha ka rukom kaba dei katkum ka aiñ.
