Shillong, Naitung 09
U MLA ka Mawkynrew Constituency, u Bah Banteidor Lyngdoh, ha ka 9 tarik u Naitung, u la sam bun jait ki skhim bad ki tiar sha ki skul, ki shnong bad ki kynhun kiba hap hapoh jong ka Constituency kaba dei lyngba ka Special Rural Works Programme (SRWP) 2025-26.
Ha kane ka jingïalang ba lyngkot kaba la long ha ka sngi Palei ha ïingsah jong u, u Bah Banteidor u la sam ïa ki Computer Set bad Printer sha ki skul bad sha kiba sengkam lajong, ki kor suh jaiñ, ki Solar Light sha ki longïing kiba ym pat ïoh bording ilektrik, ki PA System sha ki shnong bad ki Balang, ki tiar bad ki mashin shet jingbam lane ‘Cake Machine’ sha kiba seng kam lajong bad ki Laptop sha ki samla pule kiba dang bteng ïa ka jingpule Master Degree ha ki skulbah bapher-bapher.
Haba ai jingkren ha ka jingïalang u Bah Banteidor Lyngdoh (MLA) u la ong ba kine ki skhim baroh ki dei kiba la bei tyngka lyngba ka Special Rural Works Programme (SRWP) 2025-26 bad ka thong ka long ban kyntiew ïa ka pule puthi, ban kyrshan ïa kiba seng kam lajong bad ban kyntiew ïa ka roi ka par hapoh ka Mawkynrew Constituency.
U la ong ruh ba kum u nongmihkhmat paidbah, ym tang ba u pyntreikam ïa ki skhim kiba ki paidbah ki dei hok ban ïoh, hynrei u ju pyrshang ruh ban ïarap ïa kito kiba don ha ka jingeh bad jingïakynduh jingjynjar, da kaba wad lad ban pynurlong ïa ki jingdonkam jong ki.
U Bah Banteidor u la pynpaw ka jingkyrmen ba kine ki tiar bad ki skhim kin long ka jingkyrkhu ïa ki nongïoh jingmyntoi bad kin ïarap ban kyntiew ïa ka jingnang jingstad, ka kamai kajih bad ka jingïoh kam ïoh jam jong ki paidbah ha ka Mawkynrew Constituency.
Ha kane ka jingïalang la ïadonlang u Bah Andra Rynjah, President ka NPP Mawkynrew Block, u Bah Tyngkai Mynsong, Treasurer, Kong Lomida Nongkynrih, President ka NPP Women’s Wing Mawkynrew Block, Kong Susan Nongspung, Secretary, ryngkat bad ki nongkitkam ka party bad kiwei pat ki riew rangbah.
