Shillong, K’lyngkot 07
Ki shipai Border Security Force (BSF) ha ka jingpeitngor ha ki thaiñ khappud bad khanglad ïa ka khaïi tuh, ha ka Lah Sngi U Blei ki la ïoh ban kuruup noh ïa ki mar bad ki tiar ki tar ba la thmu ban khaïi tuh sha Bangladesh.
Kine ki mar kiba la ïoh kurup noh da ki BSF kiba shongdor haduh kumba T.34.15 lak ki kynthup ïa ka shini, ka kyiad, ki nep syaid, rynsun, ki jingtah pynbhabriew bad ki dawai dashin kiba la thmu ban khaïi tuh sha ri Bangladesh.
Ha ka kyrwoh ki BSF ki la pynpaw ba hadien ba ïoh ïa ki jingtip kiba paka, ki la pynlong ïa ka jingkhynra ha ka shnong Muktapur bad Lyngkhat kiba hap hapoh ka West Jaiñtia Hills. Ha katei ka jingkhynra, ki BSF ki la sakhi ïa ka jingdon jong ki briew kiba wan ban tur ban wan shim ïa kitei ki mar bad ki tiar ki tar ban khaïi tuh. Haba pyrshang ban kthong ïa ki, kitei ki briew ki la phet krad sha khlaw da kaba shim kabu ïa ka jingdum bad ieh noh shadien ïa ki mar, ïa kaba la lap noh da ki shipai kiba la leit ban pynlong ka jingwad bniah ha katei ka khlaw.
Ïa kitei ki tiar kiba la ïoh kurup la aiti noh sha ka tnat Custom ba kan leh ïa kaba donkam katkum ki lynti jong ka aiñ.
