Nongstoiñ, K’lyngkot 07
Ka jingïoh ïa ka jingsumar na ka bynta ki paidbah ha ki thaiñ West bad South West Khasi Hills District, khamtam eh ïa ki kynthei armet bad ki khynnah, bunsien ka wanrah ïa ki jingeh kiba khraw. Da kaba ithuh ïa kane ka jingdonkam kaba khraw, ka Bharat Petroleum Corpo-ration Limited (BPCL) ka la sdang ïa ka projek “Pan Pynbha Jingim” (“Ka jingpynbha ïa ki jingim”) ha Meghalaya ha kaba sdang jong une u snem.
U CEO ka EID, u Varsha Chnada u la ong, kane ka projek kaba la pyntreikam da ka kynhun jong ka Envisions Institute of Development (EID) ka thmu ban kyntiew ïa ka koit ka khiah bad ki jingmih na ka jingbam jong ki kynthei bad ki khynnah ha ki district West Khasi Hills, ki jingïarap ba kongsan ki kynthup ïa ki jingïalang jong ki paidbah, ka jingleit jngoh ïa ki ïing ki sem, ki jingai dawai man ka por, bad ka jingïatreilang bad ki bor pynïaid ka koit ka khiah ha ka thaiñ bad ki nongpynkylla.
Shuh shuh la ïathuh ruh ba kawei ka jingjop kaba pawnam ka dei kaba ïadei bad ka Kong Dilin Lyngkhoi kaba dei ka nongshong shnong jong ka Dommyntong. Ha kaba sdang kane ka longkmie ka la ong ba ka artatien ban leit jingleit na ka bynta ka jingsumar khunlung namar ka jingsngewkhia shaphang ka jaka kaba eh. Kumta la pynshlur ïa ka Kong Lyngkhoi da ki nongtrei mon sngewbha jong ka projek ban pyndonkam ïa ka skhim jong u Myntri Rangbah ka Jylla (PMSMA).
Da ka jingkyrshan jong u nongtrei mon sngewbha jong ka shnong, ka Kong Lyngkhoi ka la jop ban kha ïa i khunlung ba koit ba khiah ha Civil Hospital.
La ong ruh ba kane ka case ka pynpaw ïa ka bynta kaba kongsan jong ka jingïatreilang bad ka imlang sahlang bad ka jingkyrshan kyrpang ha ka ban weng ïa ki jingkhanglad ban ïoh ïa ka jingsumar kaba bha.
Ka projek “Pan Pynbha Jingim” ka la pyni ïa ka nuksa kaba bha jong ka jingai jingshakri kaba paka ha kaba pynbha ïa ki jingmih na ka koit ka khiah jong ki longkmie bad ki khunlung ha ki jaka ba jynjar.
Da kaba pynbeit ïa ki jingeh bad ai jingkyrshan ba kyrpang, ka projek ka la ai bor ïa ki kynthei kum ka Kong Lyngkhoi ban shim ïa ki rai kiba bniah shaphang ka jingsumar jong ka bad ban pynthikna ïa ka bha ka miat jong ki khun jong ka.
La ong ruh ba kane ka jingthmu ka long kum ka nuksa na ka bynta kiwei pat ki thaiñ kiba ïakynduh ïa ki juh ki jingeh, da kaba pynksan ïa ka jingdonkam jong ki rukom treikam kiba pynshong nongrim ha ka imlang sahlang, ka jingïatreilang bad ki nongshim bynta ha ka thaiñ, bad ban pynbeit ïa ki jingdonkam ba kyrpang jong ki paidbah kiba rit paid.
