Tura, K’lyngkot 07
Ha kawei ka jingjia kaba la pynkyndit ïa ka sor Tura baroh kawei bad shabar kumjuh, uwei u samla ba dang 24 snem ka rta na Assam u la pynïap ïa la u kñi namar ka jingïakynad ha ka kam khaïi.
Kane ka la jia hapdeng sor Tura ha ka jingdonlang jong ki spah ngut ki nongsakhi.
Kane ka jingjia ka la jia ha ka por kumba 11:25 baje hynne mynstep ha kawei ka bynta jong ka Tura Super Market (basa kwai) ha kaba u Minarul Islam (24 snem ka rta na Hajirhat, Sukhchar, South Salmara, Assam) ha ka jingbitar kumno-re-kumno u la ïoh ïa ka wait ot-doh ha kaba u la dung ïa la u kñi, u Jaha Uddin (Hat Singimari, South Salmara, Assam) na kpoh – kaba la ïalam sha ka jingmynsaw jur jong une uba shah dung.
Ka jingshah dung ka la long kaba shyrkhei haduh katta-katta ha kaba bun na ki jaka ba jia katei ka jingjia ki la khah snam bad ka jingdung kaba jylliew jong utei uba shah kynnoh ka la ot lut ïa jan baroh ki dkhot met ba shapoh jong u lanot.
Ïa katei ka jingthombor ba kynsan-kynsan la sakhi da bun ngut ki bym shym la ïoh por wat ban leh eiei ne pyrshang ban pynsangeh ïa katei ka jingleh u Islam.
Mar-mar hadien katei ka jingjia, uwei u nongshong shnong u la pyntip sha Police Control Room bad tang khyndiat por ki pulit ki la poi ha katei ka jaka ban kem ïa utei uba shah kynnoh donkti bad kumjuh ban phah ruh ïa uba shah dung na bynta ban ïoh jingsumar. Hynrei une u briew u la khlad noh ha lynti ban leit sha Tura Civil Hospital namar ka jingkhraw ha ka jingmynsaw bad ka jingduh snam.
Kitei baroh ar ngut ki dei kiba die kwai bad ki don ruh ïa ki dukan kiba marjan ha Tura Super Market.
Katkum ki khubor ba ïoh lum, ka jingïakynad ha ka jingshisha ka mih namar ba u kñi u la buh ïa ka byrni kwai hakhmat ka dukan jong u, ha kaba utei uba shah kynnoh u la pyrshah naba ka khanglad ïa ki nongthied ban rung shapoh dukan jong u namar ka jingrit jong ka lynti na shakhmat.
Ki khubor pulit ki ïathuh ba ka la don lypa ka jingïashrut kaba jur ha ka liang ka kam khaïi hapdeng kitei ki arngut.
“Ka jingïania ka la khluit kynsan haba ym shym la poi sha kano-kano ka jingïamynjur lang. Ngim tip ba u la ïoh ïa ka wait hynrei kaba bud ngi la ïohi ba u la dung ïa la u kñi jong u na kpoh bad nangta u la tan shapoh lyngba ka kpoh jong u. Ka jingjia ka la pyntieng-pynsmiej ïa ngi bad ngi la pyntip sha ki pulit halor kane. Ïa utei uba shah kynnoh la kem noh mar-mar katba ïa u kñi pat la phah sha hospital. Hadien, ngi la ïohsngew ba u la khlad noh katba u dang don ha lynti,” pyntip uwei na ki nongkhaïi uba don hajan.
Utei u briew (lanot) u sah ha kawei ka ïingwai ha ka shnong Rishipara.
