Shillong, K’lyngkot 07
Ka Sorkar Jylla kat haduh mynta ka dang sah ha ka umdum halor ka jingpynher ‘Drone’ sha suiñ kaba la pynsuba ba ka dei jong ki shipai Bangladesh ha u Nohprah 2024.
Lah ban pynpaw ba ha u Nohprah mynshem snem ki paidbah ki la ïohi ïa ka ‘drone’ ba la suba pynher da ki shipai Bangladesh.
Nyngkong ïa kane ka ‘drone’ la ïohi ha ki bynta jong ka Shella bad Sohra hapoh East Khasi Hills District, bad katto-katne sngi hadien la pyntip ruh ba la ïohi ïa kajuh ka jait drone ha ka thaiñ Mawkyrwat, South West Khasi Hills District.
Haba kren bad ki lad pathai khubor, u Chief Secretary ka Jylla, Bah DP Wahlang u la ong ba la shu ïoh jingtip ba la ïohi ïa ka drone kaba her ha ki bynta jong ka Jylla Meghalaya kiba don marjan bad ka khappud Bangladesh, hynrei haduh mynta ym pat lah ban tip kaei ka daw ba la pynher ïa ka drone sha kane ka Jylla.
U la ong ba haduh mynta ka dang don ka jingwad bniah halor katei ka jingïohi ïa ka drone ka ban sa pyntip pat hadien ba la ïoh ïa ka daw.
Ha kawei ka liang une u heh ophisar ka Jylla, u la ong ba kumba ka long mynta kam don kano-kano ka jingjia ha khappud Meghalaya bad Bangladesh, bad pyntip ruh ba ka don ka jingïatreilang hapdeng ki BSF bad ki pulit ka Jylla ban pynthikna ïa ka jingshngaiñ ha khappud.
Haba kylli, u Bah DP Wahlang u la ïathuh ba kumba ka long mynta kam don kano-kano ka jingpyntip ba ki don ki briew na Bangladesh kiba rung beaiñ sha kane ka Jylla.
