Shillong, K’lyngkot 07
Ki nongïalam ka Hynñiewtrep Border Dispute Redressal Forum (HBDRF) ha ka Sngi ba-ar jong ka 7 tarik u Kyllalyngkot, 2024 ki la leit ban ujor sha ka Meghalaya Human Rights Commission (MHRC) halor ka jingdon ka jingpynkheiñ ïa ka hok longbriew-manbriew jong ki paidbah.
Ha ka jingïakren bad ki lad pathai khubor, u Chairman ka HBDRF, Bah Chandame Sungoh, u la ong ba na ka liang ka seng ha ka jingujor ki la pynpaw ïa ki lai tylli ki mat kiba ïadei bad ka jingpynkheiñ ïa ka hok jong ki paidbah.
U la ong ba ka seng ka la ujor ha kaba ïadei bad ka jingshah knieh noh ki jaka-puta jong ki paidbah Khasi-Pnar kiba shong-ba sah hapoh ka Elaka Labang Nongpyllut bad kitei ki jaka ki dei ki hok longtrai-mantrai da ki paidbah Khasi-Pnar naduh mynshuwa hynrei ba la pynhap noh pat shapoh ka Karbi Anglong Autonomous Council naduh ka por ba thaw ïa ka ha ka snem 1952.
“Ki jaka kiba ngi shong-ngi sah ïa kaba la tip kum ka Elaka Labang Nongphyllut kaba ngi tip paidbah kum ka Block-1 ka dei ka jaka jong ngi naduh hyndai-hynthai hynrei la pynhap jubor noh shapoh ka Karbi Anglong Autonomous Council naduh ka por ba shna ïa ka District Council”, ong u Bah Sungoh.
Kawei pat ka mat ka dei halor ka jingshah lehbeiñ jong ki paidbah Khasi-Pnar kiba shong ba sah ha Elaka Labang Nongphyllut ha kiwei pat ki liang naduh ba la pynhap shapoh ka Karbi Anglong Autonomous Council haduh ba ym kheiñ briew shuh ïa ki.
“Naduh ka snem 1997 haduh ka snem 2016, hapdeng kine ki snem ka jingim jong ki briew jong ngi kiba shong-ba sah shatei ka long kaba kordit shisha haduh katta-katta”, ong u Bah Sungoh.
U Bah Sungoh u la ong ruh ba naduh ba la mih ki kaikhlaw kiba kynthup ïa ka Karbi National Volunteers (KNV) nangta ka KLRA, ka KPLT bad ka UPDS hapoh kine 10-15 snem, ka jingeh jong ki paidbah ka long kaba haduh katta-katta namar ba ïa ka hok longbriew-manbriew la shah ïuhroit noh.
“Kine ki kaikhlaw ki la dawa pisa na ki briew jong ngi na man la kawei-pa-kawei ka thliew ïing man la ka snem ha kaba kine ki longïing ki la hap ban siew ïa ka khajna ïing sha kine ki kaikhlaw bad nalor kane ka khajna, ki briew kiba kham don-kham em ne kiba don ïa ki lyngkha rep, ki hali, ki pynthor kba bad ki jingri-jingdup, ki hap ban siew la ka jong ka khajna ha ka dor kaba heh naduh ka T. 2 hajar haduh T. 5 hajar ha ka shisnem ha manla kawei-pa-kawei ka kynhun seng lehnoh”, ong u Bah Sungoh.
U la bynrap shuh-shuh da kaba ong ba kine ki briew ki ju kem bad siat naphang ïa ki jingri-jingdup bad kim ju siew satia da ka dor, bad wat ïa ka ja bad ka jingtah kaba ki shet ruh, kitei ki paid Karbi ki la rah bad ki la leh ruh ïa ki kam khlem akor kiba bunjait pyrshah ïa ki kynthei bad khynnah.
“Ka dei na kane ka daw ba ki paidbah nongshong shnong jong ka Labang Nongphyllut hapoh kine 70 snem tam, ki hap ban phet shnong haduh lai sien ha kaba nyngkong ka dei ha ka snem 1971-1972 namar ka jingleh donbor jong ki pulit Assam bad ba ar ka dei ha ka snem 2003 namar ka jingshah leh donbor ha ki seng kaikhlaw bad ba lai pat ha ka snem 2015 ha ka jingïasylla lang bad ki seng lehnoh bad ki paidbhur Karbi”, bynrap u Bah Sungoh.
