Shillong, K’lyngkot 07
Ka Voice of the People Party (VPP) ka la jied bujli noh da u Dr. Juristman Ïawphñiaw ha ka jaka jong u Bah Marbiang Nongsiej ban long kum u kyrtong u ban ïa aireng ha kane ka ilekshon ban wan sha ka Khasi Hills Autonomous District Council (KHADC).
Ka VPP lyngba u Secretary ka State Election Committee u Dr Londoner M Sohtun ha ka jingpynbna kaba la pynmih ha ka sngi Ba-ar, ka la pyntip paidbah ba ka la sei bujli da u Dr Juristman Ïawphñiaw ban long kum u kyrtong ka VPP na Nongstoiñ Konstitwensi ha ka jaka jong u Bah Marbiang Nongsiej, ïa uba ka la dep ban pynbna ha ka thup kyrteng ba la dep ban pyllait naduh u snem ba la lah.
Ha ka kyrwoh ba la pyllait, la pyntip ba ïa ka jingthep kyrteng jong u Bah Marbiang Nongsiej, kaba la dep ban pyllait ruh ha ka thup kyrteng, la dep ban weng noh. Ïa ka rai la shim na ka bynta ka jingmyntoi jong ka seng bad ki paidbah hi baroh kawei, ong u Dr. Londoner M. Sohtun ha ka kyrwoh.
Lah ban pynkynmaw ba ka VPP ka la dei ka seng saiñpyrthei kaba nyngkong eh ban pyllait ïa ka thup kyrteng jong ki kyrtong ki ban ïa aireng ha ka ilekshon MDC sha ka ïingdorbar thawaiñ jong ka KHADC bad JHADC, ha kaba ka la sei kyrtong ruh na baroh ki 58 tylli ki konstitwensi ha kine ki ar tylli ki council, kata 29 ngut na KHADC bad 29 JHADC.
Hadien katto katne taïew ka jingïaid lynti hadien ka jingpynbna kyrtong, ka la pur ka khubor ba ka la don pat ka jingpynbor ïa u kyrtong na Nongstoiñ ba u dei ban weng noh ïa ka kyrteng, hynrei kaba ym shym la lah ban pynshisha bad dei tad haduh kane ka sngi ba mynta, lyngba ka kyrwoh khubor ba la pyllait da ka VPP, ba ka jingsaphriang ka khubor ka la long kaba shisha.
Ha ka kyrwoh ba la pyllait da u Secretary ka State Election Committee, ym shym la batai satia ïa ka daw ba halor kiei ki nongrim la weng noh ïa une u kyrtong bad ban sei bujli da uwei pat.
Lah ban pynkynmaw ruh ba na ka liang ka VPP ka la dep ban kren shai ba ka lah ban weng ne pynduh noh ïa ka jinglong kyrtong jong kino-kino ki kyrtong na bynta ka ilekshon MDC ban wan lada ki ïaid lait na ki nongrim ne jingbthah jong ka seng.
ïa kane ka rai la shim da ka State Executive Committee jong ka VPP ha ka jingïalang kaba la long ha ka 9 tarik Nohprah, 2024, ban pynshai ba ka don ïa ka hok ban khmih bniah bad/lane ban weng noh ïa ka jinglong kyrtong jong uno-uno ne kano-kano ka kyrtong na bynta ka ilekshon sha ka Khasi Hills Autonomous District Council (KHADC) bad Jaiñtia Hills Autonomous District Council (JHADC) lada ha kano-kano ka khep la shem ba uta ne kata ka kyrtong kim long kiba dei hok ban shah jied kum u/ka kyrtong ba pura jong ka seng, ne kita ki kyrtong ki ïaid lait na ki nongrim/jingbthah jong ka seng.
