Shillong, K’lyngkot 07
U Chief Secretary ka Jylla u la ong ba ka Sorkar ka ju shim khia ban wad jingtip bad tohkit lyngba ki Deputy Commissioner haba don ka jingsuba ba don ka jingtih dewïong beaiñ, hynrei kumba long, ym don satia ka sakhi kaba tikna ban ong ba ka don ka jingtih dewïong beaiñ mynta.
U Chief Secretary u la pynpaw ïa kane halor ka jingmih ka jingkynnoh man la ka por ba ka don ka jingtih dewïong beaiñ ha Jylla.
U la ong ba ka Sorkar ka ju ïohpdiang ki kaiphod ne jingpyntip halor ka jingtih dewïong bad na ka liang ka Sorkar ka ju phah ruh ïa ki DC ban wad jingtip kaei kaba jia.
Dang shen, ka don ka jingujor sha u Justice (retired) B P Katakey ba ka don jingtih dewïong beaiñ ha thaiñ West Khasi Hills bad South Garo Hills ha kaba la shalan ruh sha Bangladesh da kaba shu pyndonkam da ki kot ki sla kiba thok kiba batai ba ïa u dewïong la wanrah na Nagaland.
Kane ka mat halor ka jingtih dewïong ka dei kaba la ju shim bha da ka Committee u Justice Katakey bad kumjuh ruh da ka Meghalaya High Court.
Ka jingkhang ban tih dewïong ha Meghalaya ka la sdang naduh u snem 2014 lyngba ka hukum jong ka National Green Tribunal haduh mynta namar ka jingtih dewïong ka dei ban ïaid noh katkum ka jingstad ka juk mynta.
