Nongpoh, K’lyngkot 08
U Chief Executive Officer (CEO) jong ka LS Syiemlieh Production, Bah Lansius Syiemlieh haba kren sha ki lad pathai khubor u la pyntip paidbah ba ka Grand Finale jong ka Ri Bhoi Superstar, Season 2 yn pynlong noh ha ka 15 tarik mynta u bnai ha Umsning Auditorium Hall naduh ka por 3 baje janmiet.
U Bah Syiemlieh ha ka jingïadon ryngkat jong u Bah Standwell Manih, u la ïathuh ruh ba hadien ba la lah ban pyndep ïa ka Semi Final ha kine khyndiat bnai ba la dep, ki la don kumba 15 ngut ki samla donsap na kylleng ki bynta ka Ri Bhoi kiba la ïoh ban rung sha katei ka Grand Finale ban ïakhun ïa ka nam lahduh.
Halor kane ka bynta, u Bah Syiemlieh lem bad u Bah Manih, ki khot bad wer ïa ki paidbah ka thaiñ Ri Bhoi bad ka Ri Khasi Jaiñtia kiba ju kyrshan na ka por sha ka por ba kin wan ban ïadon bynta lang ha katei ka sngi kum shi bynta ban ai mynsiem ïa ki samla donsap ka thaiñ ba kin dang lah ban kiew shaphrang.
Shuh shuh, ki la pyntip ruh ba ha katei ka sngi, yn wan ruh ban ïadon bynta da ki tyngshop bad puron ba pawnam ka jylla kum shi bynta ban pynshit pynshngaiñ bad ai mynsiem ïa ki samla donsap ka Ri Bhoi ki ban ïa knieh ïa ka nam lahduh jong ka Ri Bhoi Superstar, Season 2.
