Shillong, Naitung 23
U Bah Roy Kupar Synrem, President ka Hynñiewtrep Youth Cou-ncil (HYC) u la ong, ba ka party BJP ka la pynmih lypa ïa ka kyrwoh halor ka jingkren jong uwei u nongïalam ka BJP, Youth Wing, kata u Samla Mewaker Lyng-doh, kaba um ïohi ba kadei kaba biang bad kaba don jingkitkhlieh.
“Kum u briew uba la nang la stad, u dei ban kren da ka rukom kaba da ka jingïeid ïa ki paidbah bad kaba kitkhlieh,” la ong u Bah Roy Kupar Synrem haba kren sha ki lad pathai khubor ha ka sngi Palei jong ka taïew.
Lah ban pynkynmaw ba dangshen u Samla Mewaker u la kren ha ki rynsan social media kaba la saphriang bha da kaba ong ‘Lada kino-kino kiba pynlong jingïakhih dei ban siat’.
Une u Samla nongïalam ka BJP Youth Wing u la kren halor ka jingïakhih ki samla pule ha Nongbah Delhi, kaba dangïaid wat haduh mynta ruh.
Kane ka jingkren jong une u samla, ka la pynbitar lep ïa kiba bun balang, khamtam ïa ki kynhun seng bhalang bapher-bapher, ban pynlong ki jingïalang paidbah.
U la ong ruh ba ha ka synshar paidbah, baroh ki nongshong shnong ki don hok ban ïakhih. Ka Riti Synshar ka Ri India ka ai ïa ka hok ban ïalum paidbah, ban pynpaw ïa ka jingmut bad ban kren laitluid. U la ong ba tang namar ba ki paidbah ki ïakhih, kam mut ba ki long pyrshah ïa ka Sorkar.
Shuh shuh, u la ong ba ym dei ban pyntieng ne byrngem ïa ki briew tang namar ba ki pynpaw ïa ka jingïapher jingmut. Ha ka synshar paidbah, ka jingïapher jingmut kadei ka hok jong u paidbah, bad ym dei ban ñiew ïa kiba ïakhih kum ki nongshun ne lehnoh.
Halor kane, na ka liang u Bah Roy Kupar Synrem u la pynrem jur ïa kine ki jingkren bad u la dawa na ka BJP Meghalaya, ba kan shimkhia ïa katei ka jingkren.
U Bah Roy Kupar u la kyrpad ruh ïa ki bor ka aiñ ha ka Jylla, ba kin peit bniah ba la don ne-em kano-kano ka aiñ kaba lah ban pyndonkam ha kaban mudui ejahar (register case) pyrshah ïa u katkum ki kyndon jong ka aiñ.
