Shillong, Naitung 23
Kawei ka Samla kynthei kaba la wan ha ka jingïalang ba la pynlong da ka Hynñiewtrep Youth Council (HYC), ha Khyndailad, ka la pynpaw da ka jingbitar ha kaba ka la ther tyngeh ïa u Narendra Modi, uba dei u Myntri Rangbah-duh ka ri India.
Kane ka samla ka la ong, ba u Modi u ju kren ban ïada ïa ki kynthei lyngba ka Beti Bachao, Beti Padhao, hynrei ka jingleh jong u ka long pat da khongpong, kumta ka la donkam ban ong ‘Modi Bhagao Desh Bachao’ kaba mut ‘Beh noh ïa u Modi ban im ka Ri’.
“Baroh ngi ki samla pule ngi la sngewsih halor ka jinglait tuh ki paper exam NEET. Kane baroh kadei ka jingphiel ka tnad pule puthi ka Sorkar,” ka la ong.
Ka la buh ruh ka jingkylli sha u Myntri Rangbahduh ka Ri bad sha u Myntri ka tnad pule puthi, da kaba ong ba balei kim lah ban buh ki exam kiba biang, “Nga pyrkhat ba kine ruh ki ïoh ha ka kam kum ki Myntri bad ha ka kyrdan, kadei lyngba ka jingleh tuh.”
Na ka liang kawei pat ka samla pule kaba la wan ban ïashim bynta lang ha katei ka jingïalang ba la pynlong da ka Hynñiewtrep Youth Council (HYC) ha Khyndailad ban ai ka jingkyrshan ïa ki samla kiba dang ïakhih ha nongbah Delhi, ka la pynpaw ka jingbitar ïa u Dharmendra Pradhan, u Myntri ka Sorkar India ba dei khmih ïa ka tnad pule puthi.
Haba ai jingkren ha ka jingïalang, kane ka samla ka la ong “U Myntri um dei shuh ban pyrkhat ïa ka bor kaba u don, hynrei u dei ban pyrkhat noh na bynta ki samla pule”.
Nalor kata, ka la ong ruh ba lada u dei u Myntri u bymnang bymstad bad um lah ban thoh, ka la wanrah da ka sia, khnang ba u lah ban ai da ka ‘thumb print’.
Lah ban kdew ba ka kane ka jingpynlong ka HYC ïa kane ka jingïalang ha Khyndailad ka long kum shibynta ban ai mynsiem bad ban pynpaw ka jingkyrshan ïa ki samla pule ha Nongbah Delhi kiba la ïakhih pyrshah ïa ka Sorkar BJP bad ban dawa ba u Myntri ka tnad pule puthi ka Sorkar India, u Dharmendra Pradhan ba u dei ban hiar shuki noh mardor hadien ba lait tuh ki jingkylli exam NEET.
