Shillong, Naitung 23
U Sohtrun uba thiang bad uba bang na Meghalaya mynta la lah ban ïoh sa ha nongbah Bengaluru lyngba ka Swiggy Instamart, ïa kaba la tip kum u Sohtrun na Meghalaya.
Une u soh u dei uba la shim beit beit na Jirang Organic Farmer Producer Company bad la sop bad song bha ban pynthikna ban pynneh pynsah ïa ka jinglong jingman une u soh.
Kane ka rukom leh ban pynpoi beit beit sha ki nongthied ka dei da ka jingthmu ba ki nongrep kin ïohnong bha bad ban tei ruh ïa nam ka jylla Meghalaya ha ki ïew hapoh ka ri.
Kane ka sienjam ka dei kaba ïaid ryngkat bad ka jingtynruh ka Sorkar Jylla ban kyntiew ïa ka roi bad ka ïoh ka kot ki nongrep, hapoh ka jingïalam u Myntri Rangbah ka Jylla u Conrad K Sangma.
Ki heh ophisar kila ong, ba kane kan ïarap ha kaban btin lynti ha kaban pynïasoh ïa ki nongrep na nongkyndong bad ki nongthied kiba na sor bad ban pynlong ïa u marrep na ka thaiñ kum uba donnam hapoh ka ri.
Kane ka jingsdang ïa ka Instamart ka dei hadien jong ka jingseisoh ka 4th Meghalaya Pineapple Festival ha Dilli Haat, New Delhi, ha kaba 30 metric ton la lah ban die hapoh jong ka 3 sngi.
Ban pynïar shuh shuh, ka Sorkar Jylla kala ïasoi ïa ka MoU bad ka Flipkart bad NCDEX e Markets Ltd ban pyndie bad pynïaid ïew ïa une u soh uba la pynmih na ka jylla Meghalaya.
