Shillong, Naitung 23
Ha ka step jong ka sngi Palei, ki ophisar ka tnad Shillong Municipal Board (SMB) ki la leit ban jurip ïa ka jaka ïeng kali ha Anjalee, kaba ki la thmu ban pynrung ïa baroh kiba shongdie madan, kiba kynthup, na Them Iewmawlong, Mot phran, Bimola, Wahtha-pbru bad Umsohsun.
Kane ka jingthmu pynkynriah ha katei ka jaka, kadei ynda la dep ban weng lut ïa baroh na ki jaka ba ki ju die jingdie ha surok, ban kylluid ka jaka ïaid ki paidbah.
Ha kane ka step, ka la mih ka jingbitar na ki nongdie madan baroh, namar ba kim pdiang bad kim hun ïa ka jaka ba la thmu ai ka Sorkar, da kaba kynnoh ba katei ka jaka ïeng kali, kaba don ha Anjalee, ka la khapngiah lypa, hynrei ka Sorkar ka thmu ban thynñian kumba thynñian jhur.
Haba kren sha ki lad pathai khubor, ki nongdie madan ki la ong, ba balei ka Sorkar kam pynkynriah bad ai jaka ha Stand Jaïaw kaba dei ka jaka ba kylluid bad balei ka shna jaka ïeng kali pynban.
Ki la ong ba kane ka jingleh ka Sorkar, ka lah ban don kaei-kaei sha lyndet, ba ka ïuhroit ïa kiba die madan.
Ki nongdie madan ki la pynpaw ruh ka jingbitar, da kaba ong “Ka Sorkar ïa ki nongdie madan ka weng syndet-syndet, hynrei ïa ki kharmetor pat kim pat weng satia haduh mynta. Ki shu kular man ka por ban wengnoh hynrei kam shym la urlong haduh mynta.
“Wengshuwa ïa ki khar metor bad sa thep ïa ngi kiba die madan hangtei,” ki la ong.
Haba ka Sorkar ka thmu ban pynrung ïa baroh kiba shongdie jingdie, ba na Them Iewmawlong, Motphran, Bimola, Wahthapbru bad Umsohsun, bad ïa ki bus ba ju ïeng ha kane ka jaka pat kin leit buh shaei? Ban shu thynñian ïa ngi kiba die madan kumba thynñian jhur ngin nym pdiang da lei-lei ruh.
“Lada ka Sorkar ka kwah ban ai ka jaka, kadei ban ai da ka jaka ba kylluid, ym dei ban ai ha jaka ïeng kali, kaba la khapngiah lypa. Ka jaka ha them metor kadei kaba biang bha, ka Sorkar kadei ban wengnoh ïa ki kharmetor bad ai ka jaka ïa ngi hangtei, balei ban pynjngai ïa ngi,” ki la ong.
“Ngi kwah ba ka Sorkar kan weng shuwa ïa ki kharmetor bad ka Lum Survey, kaba la jyllei da ki nongdih drok. Ka Sorkar ïa u rit u ria ka ïuh roit hynrei ïa kiba don ba em kim lah ban pynkhih eiei. Kumta dei ban wengnoh shuwa ïa ki kharmetor bad ai ka jaka ïa ngi hangto ban die jingdie,” la bynrap biang kiba die madan.
