Shillong, Naitung 23
Ki bahaïing hasem kiba shong ba sah ha Muktapur, West Jaiñtia Hills District ki don jingkyrmen ba kin ïoh ban ïakynduh biang sa shisien ïa u Kwis Sumer uba dang 23 snem ka rta uba la jah haba u leit bylla sha Bangalore.
U Kwis Sumer u la jah ha Bangalore naduh ka 13 tarik mynta u bnai bad lada kheiñ haduh mynta ka sngi ka 23 tarik Naitung ka la long shiphew sngi hynrei ki bahaïing kim ïoh jingtip shuh.
Haba ïakren bad ka para jong u Kwis, ka Shiti Sumer ka la ïathuh ba ki bahaïing ki la ïoh jingtip ba u hynmen jong ka u la jah ha Bangalore ka dei ha ka 13 tarik mynta u bnai da ka jingwan ïathuh u para jong u Sanu uba la don lypa sha Bangalore.
Ka la ïathuh ba haduh mynta ka sngi kim shym la treh shuh ban ïakren phone bad u Sanu namar u la sdang ban kyllain ïa ka rukom jubab.
Ka la ïathuh ba ka jingleit jong u Kwis ban leit bylla sha Bangalore ka dei ba la khot da u Sanu hynrei ynda la poi sha Bangalore u la jah bad haduh mynta kim ïoh jingtip shuh.
Shuh shuh ka la pyntip ba u Kwis u la don lok bad don uwei u khun hynrei mynta ki sah satang ha ka umdum.
Ka la ïathuh ba ki bahaïing hasem ki don jingkyrmen ba kin ïoh ban ïakynduh ïa u Kwis namar ki hap ban leit wad ïa u.
Na ka liang ka KSU Bangalore Unit ruh ka la pyrshang ban wad ïa u Kwis hynrei kim pat lapdien haduh mynta.
Kumban shu pynkynmaw ba une u samla u la dep shong ïa ka rel kaba mih na Bangalore ha ka por 9:00 baje mynmiet jong katei ka 13 tarik Naitung ban leit trei bad uwei u para shnong uba kyrteng u Sanu Lamare uba la don lypa ha kawei ka jaka kaba jngai kumba 9 kynta eiei hynrei ym tip na kaei ka daw ba um shym la poi ha jaka ban hiar hynrei u la ïaid kulmar ban poi ha kawei ka shnong haduh ban leit tied ïing jong ki briew ki bym ithuh haduh ba un shah beh ha ki paidbah.
Na ka liang ka kmie jong u Kwis ha ka 15 tarik mynta u bnai ka la leit ujor da ka ejahar sha ki pulit ka Muktapur Police Patrol Post ban pyntip ba u khun u la jah ha Bangalore naduh ka 13 tarik mynta hi u bnai.
