Nongpoh, Naitung 23
Ka jingjia shlei um ha ka por slap ha kiba bun tylli ki longïing kiba hap ha ka shnong Pahamlang, 17 Mer ha Ri Bhoi District kam dei satia kaba la ju jia naduh ki por kiba mynshwa, hynrei ka dei na ka jingleh khlem akor jong ki katto katne ki hehspah kiba don ha ka bor. Kane ka jingshlei um kala buh jingeh shikatdei ïa ki longïing kiba la shah pynduh ïa ki bun ki jingdon jingem jong ki na ka umsaw ha kane ka aiom slap.
Ha ka step jong ka 20 tarik ruh kala don ka jingther kaba jur jong u slap kaba la pynlong ïa kiba bun tylli ki longïing ban shlei da ka um saw um ktieh hapoh ki ïing ki sem jong ki kat haduh ba ki hap ban phet na la ki ïing ki sem ryngkat ka jingjaw ummat ban lait na ki jingjia ba sngewsih.
Kitei ki nongshong shnong kiba la mih paidbah ha ka sngi Palei ban leit ujor sha u Additional Deputy Commissioner ka Ri Bhoi, u Bah Jonathan Shylla, kila kynnoh ba ha ka jingim ka jong ki naduh ba ki la sah mynta da ki phew snem ha katei ka jaka, kam pat don satia ka jingshlei um kumne, hynrei kane ka wan jia tang namar ka jingtheh khyndew khlemakor da u Bah Renikton Lyngdoh Tongkhar, MLA ka Mawkyrwat kaba la set ïa ki nala um bad pynlong ïa katei ka umslap ban shlei sha ki ïing ki sem.
Ki don kumba 17 tylli ki longïing kiba shah ktah ha ka jingshlei um bad katto katne na ki longkmie, kila kynnoh ba katei ka jingjia kala pynlong ïa ki ban duh lut ïa ki mar rep, ki jingdon jingem nalor ka jingorpait ki kynroh ïing bad pyntip ruh ba ka jingduh na katei ka jingshlei um, kala palat ïa ka T.40-50 lak.
Kitei ki longkmie ryngkat ka jingkthang mynsiem, kila buh ruh ka jingkyrpad sha ki hehspah ki high level ba kin pyrkhat bad isynei lem ïa ki, kiba wan na ki longïing kiba duk ba kyrduh, ki sem shilliang ki kup shilliang bad kiba shu im da kaba bylla sngi.
Ha ka jingkynduh bad utei u heh ophisar jong ki bor pynïaid district ka Ri Bhoi, kitei ki longïing ba la wan ban synran lang da ki nongïalam ka Ri Bhoi People’s Council (RBPC) kila pynsngew ïa ki jingeh jingjynjar ba ki mad. Na ka liang utei u ophisar ruh u la kular ban shimkhia ban leh ïa kaba donkam halor kane ka jingeh kaba ki paidbah ki mad bad ïakynduh.
Na ka liang u Bah Jayson Lennox Nongrum, President ka RBPC u la thalain tyngeh ïa ka jingleh khlem akor bad ka jingleh bym suidñiew jong u Bah Renikton Lyngdoh Tongkhar kaba la pynlong ïa ki paidbah ban hap mad jingeh bad jingjynjar shikatdei.
Utei u nongïalam ka seng u la buh ka jingkyntu sha ki bor pynïaid district ba ki dei ban shimkhia mardor halor kane ka kam bad ruh khamtam ban pynlong ïa ka jingjurip na ka bynta ban ai ïa ki lad jingïarap kiba kyrkieh sha kitei ki longïing kiba shah ktah bad ban pynbeit kloi ïa kane ka kam, ym ban ap haduh ba kin hap ban mad biang sa shisien pat kiba kum kine ki jingjia.
