Shillong, K’lyngkot 08
U Bah Hunboklang Mynsong uba dei u Sordar ka shnong Nonghali u la kam ba ki don tang kumba 25 haduh 30 ïing kiba pyrshah ban tei ïa ka jaka theh ñiut kaba heh da ka Sorkar Jylla na ka bynta ban lum ban lang ïa ki jaboh jabaiñ bad ki ñiut ki ñier na sor Shillong.
U Bah Mynsong u la pyntip ba ka shnong Nonghali ka don palat 2300 ngut ki nongshong shnong na ka 357 tylli ki ïing hynrei tang hapoh 30 ïing kiba pyrshah.
Ka shnong Nonghali kaba hap ha Mawryngkneng Block, East Khasi Hills District kaba jngai kumba 2 kynta eiei lada shong da ka kali na Shillong bad ka don ka lad na surok Shillong Bypass na ka shnong Mawkhanu ban ïaid lyngba ka shnong Jaroit.
Namar ba ka Synjuk Nongsynshar Shnong Par Umkhen ka la pynkhreh ban leit thom da ka bor haba ka Meghalaya State Pollution Control Board (MSPCB) kan pynlong jingsngap ïa ka sur jong ki paidbah ha ka 9 tarik mynta u bnai ha shnong Nonghali, na ka liang u Sordar ryngkat ki nongkitkam shnong ruh ki la pynkhreh ban ym ailad lada ki briew kiba nabar kin wan ban leh donbor.
Shwa ban poi lashai ka sngi, U Nongsaiñ Hima ha ka 8 tarik Kyllalyngkot 2025 u la leit sha ka shnong Nonghali ban ïakynduh ïa u Sordar Bah Hunboklang Mynsong ryngkat ka jingïadonlang ki nongkitkam shnong.
U Bah Mynsong u la ïathuh ba ïa kane ka jingthmu ban tei ïa ka jaka theh ñiut ha Nonghali la sdang naduh u snem 2019 ha ka por ba long da uwei u Sordar ha kaba ka Sorkar ka la wan ban pynshai bad batai ba kan ym ktah ïa ka koit ka khiah.
U la ïathuh ba dei ha u bnai Naitung 2022 ba ka la mih ka kynhun ban pyrshah ryngkat ka shnong kam sngap shuh namar ki kam ki la ïaid shakhmat.
U la ïathuh biang ba ka shnong kan ai haduh 200 akar ka jaka ban tei ïa ka jaka theh ñiut bad ïa ka dor yn sa pynbeit hadien ba la dep pynbeit ïa ka jingsngap ïa ka sur jong ki paidbah.
Shuh shuh u la pyntip ba ki nongkitkam shnong ki la dep wan jurip ïa ka Marten kaba dei ka jaka theh ñiut ha Mawlai bad ki dkhot jong ka shnong ruh ki la ïoh ban leit jurip ïa ka jaka theh ñiut sha Goa kaba ki la leh katkum ka juk stad kaba mynta khnang ban ym ktah ïa ka koit ka khiah.
Na ka liang u nonglum khubor u la ïoh ruh ban leit ringdur ïa ka jaka kaba ka shnong kan ai ïa ka jaka theh ñiut kaba ka jingshna ïa ka surok mynta ka dang ïaid shait shait.
Kumjuh ruh la ïoh ban ringdur ïa ka jingpynkhreh ban shna ïa ka jaka ban sngap ïa ka sur jong ki paidbah ha shnong Nonghali ka ban long lashai ka sngi ka 9 tarik Kyllalyngkot 2025.
