Shillong, K’lyngkot 08
U Secretary ka Khasi Jaiñtia Christian Leaders Forum (KJCLF), Rev. Dr. Edwin H Kharkongor, u la ong ba ka Sorkar Meghalaya ka dei ban long kaba nyngkong eh ha ka Ri halor ka jingpynpaw pyrthei jong ka ïa ka jingthmu ban plie ïa ka Skulbah ka Jylla ba nyngkong eh kaba khlem niam da ka jinglehniam Khristan ïa kaba la tyrwa da ka jingsngewrit.
U Rev. Edwin u la ong ba ka Jylla Meghalaya ka la pawnam ha ka ban pynlong ïa ki tamasa kiba itynnad bha kiba ju poi sha ki kyrdan jong ka jinglong kyrpang bad ka jingshim pisa, bad kaba pawnam ha kaba pynlong ïa ki jingpynbna paidbah kiba bun hynrei ka long kaba sngewsih haduh katta-katta pat ba kane ka Jylla ka don ha ka kyrdan kaba sha trai tam ha ka ri ha ka liang ka kyrdan pule-puthi.
U la ong ba ka jingseng ïa ki jaka pule kiba kham shalor ka long kaba la sngewnguh shikatdei eh bad ka long kaba donkam ïa ka jingkyrshan, wat la katta ruh ka jingpynbna kaba jur bha ïa ka jingthmu ban plie ïa ka skulbah jong ka Captain Williamson Sangma ha ka 13 tarik u Kyllalyngkot bad ka jingkhihwin kaba ka la dep pynmih ka long kaba jngai shisha na ka jinglong Khristan ne niam na ka bynta kata ka kam.
“Ha ka ri jong ngi, ka niam bad ka jingngeit ki don ha ki bynta shimet jong u briew, bad ngi ïasam lang ha ki jingïadei parabangeit jong ka jinglong niam kumba la buh ha ka Riti Synshar jong ka ri India”, ong u Rev. Edwin.
Shuh-shuh, u la ong ba kum ki Nongïalam Khristan ha ka Jylla ki ngeit ba ka jingshit rhem bad ka bor jong u Myntri ka tnat pule-puthi ka Jylla, Rakkam A Sangma bad ki jingdon jingem jong ka Sorkar ba la ïalam da u Conrad K Sangma kin kham bha ban pyndonkam ha ka ban pynbha ïa ka jingtreikam jong kane ka tnat bad ban pynbeit ha ka por ïa ki jingdonkam jong ki samla pule bad ki nonghikai ha ka ki jaka pule hapoh ka Jylla.
“Ka jinghikai ka dei ban kyntiew ïa ka jingsngewrit bad jingburom bad pynmih jingkyrmen ïa ka lawei kaba bha. Ngi kwah ban ïohi ba ka Sorkar Jylla bad Sorkar Pdeng jong ngi kin pynpaw ïa ki jinglong jong ka jingaiti bad jingaiti lut ha ka jingshakri jong ka ïa ka jingpule bad jinghikai jong ki nongshong shnong jong ka”, bynrap u Rev. Edwin.
