Nongstoiñ, K’lyngkot 08
Ka jingpynbna jong ka Voice of the People Party (VPP) ba ka la weng noh ïa u Bah Marbiang Nongsiej kum u kyrtong MDC jong ka seng na Nongstoiñ Konstitwensi da kaba rai pat ban ai bujli noh ha u Dr. Juristman Ïawphñiaw ka la long shisha ka mat kaba shongshit bha ban ïakren ha ki rynsan ‘social media’ bapher bapher da kaba ïa pynmih ïa ki jingkren kiba har rukom, kumjuh ruh ïa ki paidbah ka Nongstoiñ Konstitwensi kaba lehse ka dei ka sien kaba nyngkong eh ba kum kane ka jingjia ka jia ïa uno-uno u briew uba ïoh ïa ka tiket na kano-kano ka seng ba un ïakhun na Nongstoiñ Konstitwensi un shah pynduh pat.
Halor kane ka phang, haba pyrshang ban ïakren bad u Bah Marbiang Nongsiej uba la shah pynduh ïa ka tiket ha ka VPP u la ong, ïa mynta um pat kwah ban ai kano-kano ka jingkren ne jingkynthoh halor kane ka bynta.
Haba ïakren pat bad ki paidbah ka Nongstoiñ, uwei na ki ‘riew rangbah u la pynpaw da kaba ong ba kane ka rukom leh jong ka VPP ka long ka kam khynnah haba la ai da u jop ne em ka shong sa ha u kyrtong keiñ haba ka committee ka la shong ha shwa ban rai ïa ka tiket ne ki shu ai ha surok ne ïa kata ka tiket.
Shuh shuh uwei pat u rangbah haba ïakren u la ong ba kane ka jingleh jong ka VPP ka long kaba bakla. U la ong ruh ba haba u kyrtong um pat biang, kim pat dei ban pynbna paidbah ïa ka kyrteng jong u.
Nangta, iwei mei-ieid iba shong die jingdie ha ïew i la pynpaw da kaba ong ba lada sngap shisien shisien ka jingkren jong u Bah Ardent ka biang palat hynrei hateng-hateng i kumba u la shu kynthoh briew palat bad i kumba u sngew ba dei tang ma u.
Shuh shuh kiwei pat ki rangbah ki la ong ba ka shong ha ka seng ban shim ïa kano-kano ka rai hynrei ka shong ha ki paidbah ba kin jied.
Haba pyrshang ban kylli ïa u Bah Goldenstar Nonglong, uwei na ki ‘riew rangbah ka seng VPP na Nongstoiñ lyngba ka phone ba u don aïu ban ong halor kane ka bynta, u Bah Goldenstar u la ong ba um pat kwah ban ong eiei hynrei katkum ka jingthoh ka jong u ha ki katto-katne ki rynsan ‘social media’ une u rangbah u la pynpaw da kaba ong ba “Ka jingrai jong ka seng ka long kaba ym lah ban pdiang satia. Lada ka seng ka mut ban pynkylla kyrtong ka la dei ban jied ïa uno-uno ne kano-kano na kito kiba la pan tiket katba ka seng ka ibit.”
Lah ban kdew ba katei ka rai pynduh tiket ïa u Bah Marbiang Nongsiej ka la mih ha ka 7 tarik u Kyllalyngkot ïa kaba la soi kyrteng da u Secretary ka State Election Committee ka VPP, Dr. Londoner M Sohtun.
