Shillong, K’lyngkot 08
U National General Secretary ka National People’s Party (NPP), Bah Sniawbhalang Dhar, u la kyntait ba ka don ka jingisih pyrshah ïa ka NPP kaba lah pat ban ktah ha ka ilekshon MDC ka ban long ha u Rymphang ban wan.
“Ngam tharai ba ka don ka jingpyrshah ïa ka NPP, lehse lada ka don ruh ngi hap ban trei shitom ha ka ilekshon”, la ong u Nongïalam ka NPP haba kren ha ka Sngi Balang.
U la ong ba hadien ka ilekshon, ka NPP kan sa thaw ïa ka Executive Committee ha baroh ar tylli ki district council.
U Bah Dhar u la ong ïa kane haba kylli halor ka jingmih noh u MDC ka Mawlai konstitwensi, Bah Teiborlang Pathaw na ka NPP ban ïakhun ïa ka ilekshon kum u kyrtong shimet.
Haba kylli la ki dang don shuh kiba lah ban mih na ka seng kumba la leh da u MDC ka Mawlai, u Bah Dhar u la ong, “Ynnai kylli na nga ïa kata, ka shong ha ki”.
U Bah Dhar uba dei ruh u Symbud Myntri Rangbah ka Jylla, u la kam ba ki don bun bah ki briew kiba kwah ban ïakhun ïa ka ilekshon MDC na ka seng NPP.
“Ka por ka dang don ngin sa ïa peit, namar ki don bun kiba kwah ban ïakhun ïa ka ilekshon na ka NPP. Ha ka ilekshon ka ju long kumta ki don kiba mih noh bad don ruh kiba wan rung thymmai”, u la ong haba kylli ba ka seng ka pyrkhat kumno lada ki dang don kiba thmu ban mih na ka NPP.
Haba kylli shuh shuh, u la ong ba ka Voice of the People Party (VPP) kam dei satia ka jingma ïa ka NPP ha ka ilekshon.
Katkum ka jingong u Bah Dhar kawei ka konstitwensi ka ïapher na kawei pat, kumta kam don jingma ïa ka NPP la ka long na ka VPP lane na kiwei pat ki seng saiñpyrthei kiba ïakhun pyrshah ha ka ilekshon.
