Jowai, K’lyngkot 08
Ki kynhun ai jingïarap kiba la trei borbah ha ka step jong ka 8 tarik Kyllalyngkot ki la ïoh ban sei noh ïa kawei ka metïap jong uwei u rangbah napoh ka krem dewïong ha Umrangso kaba ha Dima Hasao district, Assam.
Ïa kane ka metïap jong u rangbah uba kyrteng u Rajen Sherch, 42 snem rta na ka shnong Udaypur, Nepal la ïoh ban sei noh da ki dkhot ka NDRF bad ki nongngam um na ka tnat shipai Army Para Divers ha ka por kumba 8:45 mynstep na katei ka krem dewïong ba la pyntreikam beaiñ hadien ba la aiti noh sha ki bor pulit.
Lah ban kdew ba palat 12 ngut ki nongtrei par ki la sahkut noh shapoh kane ka krem dewïong kaba jylliew naduh ka step sngi Nyngkong ba la lah, ha kaba ka jingkiew jong ka um hapoh kane ka krem ka la pynshem shitom shibun ha kaba ïadei bad ka kam ai jingïarap.
Napdeng baroh 27 ngut ki nongtrei par kiba la sahkut ha kane ka krem 10 ngut na ki, ki la ïoh lait im katba hapdeng ka 13 haduh 17 ngut kiwei pat ki dang bteng ban sahkut shapoh jong kane ka krem.
Ki kynhun ai jingïarap kiba la wan ïashim bynta ha kane ka kam pyllait im kaba dang ïai bteng ki kynthup na ka tnat NDRF, SDRF, shipai na ka Indian Army, Navy bad kiwei pat ki tnat.
Ki bor pulit ka thaiñ ki la kem noh ïa u Punish Nunisa ïa uba la kynnoh ba u dei u trai jong kane ka par dewïong hapoh ki kyndon jong ka Mines and Minerals (Development and Regulation) Act.
Kane ka par dewïong ka dei kaba la pyntreikam beaiñ bad kaba la pynmih ruh ïa ka jingkylli halor ka jingdon bynta jong ki bor sorkar ka thaiñ.
Mynta ki kynhun ai jingïarap ki dang bteng ban pynlong ka jingwad ïa kiwei pat ki nongtrei par kiba dang jah rngai, katba na ka liang kiba haïing hasem jong kine ki briew kiba dang jah rngai ki la don hapdeng ka jingkutlad bad ïai ap ïa ka khubor.
