Shillong, K’lyngkot 08
Hadien ba ka la mih ka jingkynnoh bad ka jingujor da ki nongïalam ka Hynñiewtrep Youths’ Council (HYC) Sohïong Zone ha ryngkat ka jingïadonlang ki nongïalam ka HYC Nongthliew Circle ha ka Lah Sngi U Blei jong ka 6 tarik u Kyllalyngkot, 2025 shapoh ka ophis jong ka DC ka East Khasi Hills District ba ki la don ar ngut ki briew ba la tip kyrteng kum u Bah Phridensing Thabah bad u Bah Rojen Khyllait ba ki la donkti ha ka kam thok-kam shukor ha kaba ïadei bad ka jingsiew ïa ka bai lutksan (Compensation) ïa ka jaka na ka bynta ban shna ïa ka 2-Lane jong ka Shillong Western bypass, na ka liang u Bah Rojen Khyllait u la kyntait war ïa kane ka jingkynnoh ka seng kaba khlem sabut ha ryngkat ka jingpynrem jur ruh ïa ka seng.
Ha ka jingkren ai jingpynshai sha ki lad pathai khubor ha ka 8 tarik u Kyllalyngkot, 2025 ha Shillong Press Club, u Bah Rojen Khyllait u la ong ba kane ka jingkynnoh jong ka HYC pyrshah ïa u ka la ktah shikatdei eh ïa u namar ka long kaba bakla bad ka bym don nongrim satia.
U Bah Khyllait u la ong ba kane ka jingkynnoh jong ka seng ba ma u bad u Bah Phridenseng Thabah ki dei kita ki ‘Mafia’ ka long pynban kumba ki kynnoh ba kine ar ngut ki dei kita ki ‘riew kieng atiar, ki nongpynïap briew ne ki nongdawa pisa.
“Ngi sngew ban pynrem jur ïa ka jingkynnoh ïa ngi ba ngi dei kita ki ‘Mafia’ bad ngim dei hi ruh kumba ki la kynnoh ïa ngi. Haba ki kynnoh ‘Mafia’ ïano-ïano, ki lah dei ban sngewthuh lypa ba ngim dei kita nongkieng atiar lane kita ki nongpynïap briew lane kita ki nongdawa pisa nangno-nangno”, ong u Bah Khyllait.
Halor ka jingkynnoh jong ka HYC ba kitei ar ngut ki briew ki la donkti ha ka ban shim ïa ka ‘Blank Cheque’ na ki briew ban leit sei ïa ka pisa, u Bah Khyllait u la ong ba kum kita ki kam ban leit sei pisa kim don satia hynrei na ka liang jong u halor kane ka jingkynnoh jong ka seng, un shaniah beit ha ki bor jong ka aiñ ban leh ïa kaba donkam.
“Ngim don bynta ha kum kita ki kam sniew kiba ngin leh ban pynkulmar ïano-re-ïano ha kata ka kam. Ngam sngewdei ïa la jong ba ngan shu shah kat kaba ki kren ïa kaei kaba kim dei ban kren bad ngim don bynta hi ruh ha kita ki jingkren bad ki jingkynnoh jong ki”, bynrap u Bah Khyllait.
Ha kaba ïadei bad ka jingmih ka jingshah kynnoh ha ka seng ba kine ar ngut ki don ka jingïadei kaba ïajan bha bad ki briew kiba halor kaba la pynlong ïa ki ban thok ïa ka pisa ha ka ban siew ïa ka bailutksan, u Bah Khyllait u la ong ba kane ka jingkynnoh ka seng ka dei kaba bakla namar um don satia kano-kano ka jingïajan bad kita ki briew kiba halor hynrei u dei u nongshong shnong bad u nongïarap ïa ki paidbah hapoh ka shnong-ka thaw.
Shuh shuh u Bah Khyllait u la ong ba kum u nongshah kynnoh, u long ba la kloi ban ïaid da kano-kano ka lynti kaba dei ban ïaid la ka long da ka jingïakren ne wat da ka aiñ ruh kumjuh.
