Shillong, K’lyngkot 08
Ka Inter State Bus Terminal (ISBT) kaba don ha Mawlai Mawïong kan sah khongreng shwa haduh ban da dep shna ïa ka surok na Umroi sha Mawlai Bypass.
U Symbud Myntri Rangbah ka Jylla ba khmih ïa ka tnad Transport, Bah Sniawbhalang Dhar, u la ong ba ka Inter State Bus Terminal (ISBT) kan sa treikam pura biang hadien ba la dep shna ïa ka surok na Umroi sha Mawlai Bypass ba la khmih lynti ban pyndep hapoh jong mynta u snem.
U la ong ba ka Sorkar kam kwah satia ban shim ïa ka lynti ba shipor na ka bynta ban lah pyntreikam ïa ka ISBT, hynrei ka kwah ban don beit noh da ka surok khnang ba kan lah ban treikam shirta.
“Ngi la ïai ban ïa ka tnad PWD ba kan pyndep kham kloi noh ïa kane ka surok bad tang shu dep kane ka surok na Mawlai Bypass, ka ISBT kan sa treikam biang kumba ka long” ong u Bah Dhar.
U la ïathuh ba ka tnad PWD ka lah ban pyndep ïa ka jingtrei jong kane ka surok shwa ban kut une u snem.
U la pyntip ruh ba ka tnat Transport ka la shong ïa ka jingïalang man ka por bad ka tnat PWD, ha kaba la kyrpad ban leh kloi noh kat kaba lah ïa ka surok.
Halor ka jingkynnoh pyndonkam bakla ïa ka ISBT da ki kynhun runar, u Bah Dhar u la ong ba ki ophisar ki ju leit man ka por sha ISBT haduh mynta bad kam pat don satia kano-kano ka khubor halor ka jingdon ki kynhun runar ha katei ka jaka.
Ka jingpyntrei ïa katei ka surok na Umroi sha Mawlai Bypass ka long ban ailad ïa ki kali heh khamtam ïa ki bus night super ba kin wan ïeng ha Inter State Bus Terminus (ISBT) jong ka Sorkar ha Mawïong, namar hadien ba la khang ban ïaid ïa ki kali heh na ka jingkieng Umïam katei ka jaka pynïeng bus jong ka Sorkar kaba la tei ha ka jinglut kaba T.48 klur ka la shu sah khongreng namar ki bus ki hap ban ïeng sharum jong ka jingkieng.
Kham ha shwa u Symbud Myntri Rangbah ka Jylla ba khmih ïa ka tnat PWD (Roads), Bah Prestone Tynsong, u la pyntip ba kumba 80 percent ka jingpyntrei ïa katei ka surok ka la ïaid, bad la khmih lynti ban pyndep noh shwa ka por ba la buh. U la ong ba ka Sorkar Jylla ka la pyntrei stet bha ïa ka surok kaba pynïasoh na Umroi sha Mawlai Bypass ka ban mih sha ISBT ha Mawlai Mawïong ïa kaba la tip ruh kum ka VIP Road.
