Shillong, K’lyngkot 08
Ka jingthmu ban pynheh noh ïa ka kad liengsuiñ, Shillong Airport kaba don ha Umroi ka lah ban shim por kumba lai snem haduh ba ki liengsuiñ kiba kham heh kin lah ban kiew ban hiar.
Haba kren ha ka Sngi Balang u Symbud Myntri Rangbah ka Jylla ba khmih ïa ka tnat Trans-port, Bah Sniawbhalang Dhar u la pynpaw ba katei ka jingthmu ban pynheh ïa ka kad liengsuiñ Shillong Airport, ka lah ban shimpor haduh lai snem ban pyndep.
U la ïathuh ba ki Deputy Commissioner ki la nang ïaid shakhmat na ka bynta ban ithuh ïa ki jaka kiba donkam ban shim na ka bynta ban pynheh ïa katei ka kad liengsuiñ.
Haba kylli, u Bah Dhar u la ong ba ka jingdonkam jaka ka long sa kumba 22-23 akar, bad tang shu ïoh ïa ka jaka ka tnat kan pyrshang ban pyntrei noh bad kan pyrshang ban pyndep beit la kumno-kumno hapoh jong ka lai snem.
Haba kylli, u Symbud Myntri Rangbah u la ong, “Ha nga hi, nga kwah lashai-lashai ban dep, hynrei ha ka jingshisha, ka rukom treikam ka dei kaba shim por. Ka jingthied jaka, ka jingpynkhreh ïa ka DPR, ka mang tyngka, ka jingaiti ïa ka kam bad bun kiei-kiei kiba hap ban leh, kumta hapoh lai snem ka la dei ban dep, wat la katta ngin pyrshang hi ban pyndep kham kloi katba lah namar kan ai jingmyntoi ïa ki briew jong ngi hi”.
Ka jingthmu ban pynheh noh ïa ka kad liengsuiñ, Shillong Airport ka long hadien ba ka Airport Authority of India (AAI) ka la ai ïa ka kaiphot kaba arsien ba lah ban pynheh ïa katei ka kad liengsuiñ.
Ha ka jingjurip ba la pynlong ha u Nailur mynshem snem, la ïathuh ba ka jingpynheh ïa ka kad liengsuiñ lah ban leh sha ka phang Shathie (South), bad donkam shuh shuh ka jaka sa 16 akar na ka bynta kane, katba 6 akar pat ka jaka donkam na ka bynta ban pynïeng ïa ki liengsuiñ, bad na ka bynta ka lynti ïaid (runway) ka dang donkam shuh sa 900 meter ban pynjrong na ka bynta ban lah ïaid ki liengsuiñ kiba kham heh.
