Shillong, K’lyngkot 09
Ka jingsniew ki surok shnong bunsien ka pynktha maloi ïa ki bor pynïaid shnong khamtam haba don ki kynja prokram ba heh ne ki jingpynlong jingïaseng kiba hap ban pdiang ïa ka jingwan ki briew na kylleng ki jaka.
Kaba kum kane ka kam ruh ka la tyngkhuh bad ka Dorbar Shnong Laitkor Mawrie ha kaba ki hap ban bun jingmut jingpyrkhat na ka bynta ka surok ha kaba kane ka shnong kan sakhi ïa ka jingpynlong jingïaseng kyntang lyngdoh riewniam ha ka 18 tarik u Kyllalyngkot, 2025.
Ki bor pynïaid shnong ki la buh jingkyrpad sha ki nongmihkhmat ka thaiñ kata sha u MLA ka Nongkrem, Bah Ardent Miller Basaiawmoit bad kumjuh sha u MDC ka Nongkrem, Bah Lambor Malngiang ba kin kner ïa ki lad jingïarap ban maramot ïa ki surok ha katei ka bynta.
Na ka jingkhim ka por, u MLA u la phah ïa ki bor ba dei peit ïa ka tnat PWD ban jurip ha ki khyndiat sngi ba la dep, katba ha ka step 9 tarik u Kyllalyngkot, 2025, u Bah Lambor u la leit ban jurip dalade ïa ka jingmaramot ïa kaba u la sei na pla lade.
Haba kren bad ki lad pathai khubor, u Bah Lambor u la ong ka jinghiar jurip ka long namar ba ka kam ka la kyrkieh naba kan don ka jingkyntang Lyngdoh ha kane ka shnong ha ka 18 tarik mynta u bnai.
U la ong ba ka jinglong jingman jong ka surok kam i long shuh, bad kumta u la ai ka jingïarap nalade tang ban long ka jingpynkhreh shipor, khamtam lei ban don ka jingïaseng kyntang Lyngdoh. U la ong ba ka kamram kum u nongmihkhmat ba la jied da ki paidbah bad wat la um long MLA shuh hynrei kum u MDC bad ha i bor barit u la pyrshang katba lah ban leh ban pynbha, ha kaba la ïoh ban sdang ïa ka jingmaramot bad kane kan nym urlong lada ym ïoh ka jingïatreilang bad ki bor shnong.
Haba kylli, u Bah Lambor u la ong ba ym pat ïoh satia ïa ka skhim, bad kane ka jingmaramot ka long beit na ka bor barit na lade, tang ban ïoh pynsuk shipor ïa ka leit ka wan khamtam ha kato ka sngi ba kyrpang.
Na ka liang jong ki Nongïalam shnong ki la pynpaw ka jingsngewnguh ïa ki nongmihkhmat ka thaiñ, ha kaba ki la pynpaw ruh ba namar ka jingjot lut jong ki surok ba haduh ban ïaid kjat ruh la jynjar, kumta kum ka shnong kim banse ban phai khmat sha ki nongmihkhmat na ka bynta ka jingïarap.
