Shillong, K’lyngkot 09
U Myntri ka tnat Pule-Dangle ha ka Jylla, Rakkam A Sangma, u la ong ba ka jingpyrshah ka Voice of the People Party (VPP) ïa ki kot pule kiba la leh da ka Sorkar kam dei kaei-kaei, hynrei lehse ka dei tang namar ba ki kwah ban shim kabu namar ba la jan ka ilekshon MDC.
Haba kren ha ka Sngi Palei, u Rakkam u la ong ba um sngewthuh kaei ka jingmut jong ka VPP halor kane ka jingpyrshah, namar ïa ki kot pule la bud na ka National Council of Educational Research and Training (NCERT) ban pynbha ïa ka pule-dangle ha ka jylla ka ban ïaryngkat kyrdan ha ka ri.
U la ong ba ka jingkren ka VPP ka lah ban dei namar ka ilekshon, namar haba don ilekshon kin pyrshang ban wad daw da kaba kynnoh ïano-ïano. U la ong ruh ba ha ka jaka ban shu kynnoh ne kynthoh ïa kiwei kan bha ba kin ai jingmut namar da kaba shu kynnoh ïa kiwei ym lah ban pynbor ïa u paidbah ban jied.
“Kum ki nongïalam ha jaka ban shu woh nia, ki dei ban ai jingmut kumno ban kyntiew ïa ka jylla. Ka jingkynnoh ïa kiwei kam khring ïa kiwei ban jied ïa phi namar ka woh daw-woh dong kam ai jingmyntoi eiei”, la ong u Rakkam.
Dangshen, u Nongaiktien ka VPP, Dr. Batskhem Myrboh u la dawa ba ka sorkar ka dei ban bujli noh ïa u Myntri ka tnad pule-dangle namar ba um tip kumno ban pynïaid ïa ka kam hapoh ka jylla.
U Dr. Batskhem u la buh jingkylli ruh ïa ka thong ba u Myntri u thmu ban jop da kaba wanrah ïa ki kot ïarap lane ‘Guide books’ ïa ki khynnah pule bad ki nonghikai. Hato u pyrshang ban ïaid lyngkot na ka rukom hikai ban shu pynbun ïa kiba pass khlem ler eiei? U la ong ba ka jingtip ka dei kaba ïaid jai bad la thew la woh katkum ka jingmih na ka jinghikai, ym na ka jingmih (result) jong ki eksamin.
Haba kynthoh shuh shuh halor kane ka jingkren u Nongïalam ka VPP, u Rakkam u la ong ba um shym la ïoh kano-kano ka jingpyrshah na kiwei.
“Ki kot pule la shu pynkylla na ka MBOSE sha ka NCERT. Nga khlem ïoh kano-kano ka jingpynsngew pyrshah na kino-kino ki briew, la ka long na ki ‘riew pule kot, ki samla pule lane na ki nonghikai”, la ong u Myntri, ha kaba u la bynrap shuh shuh da kaba ong ba kane ka jingkren jong ka VPP ka lah ban dei tang namar ba ka don ka ilekshon ban ïalam bakla ïa u paidbah.
