Shillong, K’lyngkot 09
Ki paid nongshong shnong jong ka Par Umkhen ha ryngkat ka shnong Nonghali bad ki shnong ba marjan ha ka step jong ka Sngi Palei ki la mih paidbah ban khanglad ïa ki bor Sorkar ba kin pynlong ïa ka jingpynsngap paidbah ne public hearing ha Nonghali na ka bynta ban wanrah ïa ka Waste Management Plant (jaka theh ñiut) ha Lum Sohlait.
Kine ki shnong ki dei kiba hap ha khappud jong ka East Khasi Hills, West Jaiñtia Hills bad ka Ri-Bhoi District. Ïa kane ka jingïakhih la lamkhmat da ka Synjuk ki Nongsynshar Shnong ka Par Umkhen ha ryngkat ka shnong.
Naduh dang step, ki paidbah ki la ïamih ban khang lynti ïa ka surok da ki maw bad ki dieng hapoh ka shnong Jaroid ha shuwa ban poi sha ka jaka ban pynlong ïa ka jingpynsngap paidbah ha Nonghali.
Kane ka jingpynsngap paidbah ka dei kaba la buh ban pynlong da ka Meghalaya State Pollution Control Board (MSPCB) na ka bynta ban tei ïa ka Waste Management Plant ha Lum Sohlait kaba hap hapoh ka shnong Nonghali.
Ki paidbah ki la ïalum khrui ha surok bad khang lynti syndon ïa ki ophisar jong ka MSPCB, ki Magistrate bad ki pulit ba kin hiar sha ka shnong Nonghali.
Ha ryngkat ki placard, ki paidbah ki la pynpaw ïa ka jingpyrshah kaba jur ban wanrah ïa kane ka jaka theh ñiut haba kynthoh ba kane ka projek kan sa ktah jur ïa ka mariang bad ïa ka koit ka khiah jong ki nongshong shnong ba marjan.
Ki la pynpaw ba naduh nyngkong, ki la dep phah shithi sha ki bor Sorkar ban pynpaw ïa ka jingpyrshah ïa kane ka projek hynrei haduh mynta ki bor Sorkar kim shym la jubab satia ïa ka shithi bad thmu ban pynlong da ka bor ïa kane ka jingpynsngap paidbah.
Ha kawei pat ka liang, na ka liang jong ki bor pynïaid District jong ka East Khasi Hills ki la pynsangeh noh ïa ka jingpynsngap paidbah ïa kaba la thmu ban pynlong da ka Meghalaya State Pollution Control Board (MSPCB) ha Nonghali na ka bynta ban tei ïa ka jaka theh ñiut (Waste Management Plant) ha Lum Sohlait.
Ïa kane ka jingpynsngap paidbah ha ka jingshisha la buh ban pynlong ha ka Sngi Palei hynrei ha ka step jong kane ka sngi, ki ophisar ka MSPCB, ki Magistrate bad ki pulit ki la shah khang lynti noh ha ki paid nongshong shnong ka thaiñ ïa kaba la ïalam da ka Synjuk ki Nongsynshar Shnong ka Par Umkhen ha Jaroid.
Ha kaba ïadei bad kane, na ka liang jong ka ADC ka East Khasi Hills ka la pyntip ba namar ka jingshah pakhang lynti jong ki ophisar ka MSPCB ha ki nongshong shnong ba la hap ban pynsangeh noh ïa kane ka public hearing.
“Ngi la pyrshang ban leit sha ka jaka bala pynbeit ban pynlong ïa ka public hearing hynrei ngi la shah pakhang lynti noh ha ki nongshong shnong,” la ong ka ADC.
Kala ong ba ka jingthmu ban pynlong ïa ka public hearing ha Nonghali la leh katkum ka aiñ bad la pyntip paidbah lyngba ki kot khubor ym duna 30 sngi.
