Nongstoiñ, K’lyngkot 09
“Ngam don jingtip eiei ba halor kiei ki daw bad ki nongrim ba ki nongïalam ka Voice of the People Party (VPP) ki la weng noh ïa ka kyrteng jong nga ban long kum kyrtong ka seng ha ka ilekshon MDC sha KHADC bad ban sei bujli noh da uwei wat hadien ba la pyndep ban pynbna ïa ka kyrteng jong nga,” la ong u Bah Marbiang Nongsiej.
Ha ka kyrwoh khubor ba la pyllait, u Bah Marbiang u la ong, “Nga dap da ka jinglyngngoh ba haduh kane ka sngi ba mynta na ka liang ka State Election Committee ka VPP ka khlem khot ïa nga ban ïakren eiei shaphang kata ka kam tiket ba la dep ai ïa nga bad lada don ki daw ka la dei ban khot markhmat ban kylli shaphang kita ki daw hynrei em bad wat haduh ban da pynmih ïa ka ‘notifications’ ha ka 7 tarik u bnai Kyllalyngkot 2025, nga shu ïohi lyngba ki lad pathai khubor ba la ai noh sha uwei ïa ka tiket bad la weng ïa nga bad ki khlem pyntip eiei la ka long da kaba phone ne ka jingthoh bad kane ka la buh ïa nga ha ka umdum.”
U Bah Marbiang u la pynkynmaw ruh ba wat na ka liang u Nongaiktien jong ka VPP u la kren shai ha ka kyrwoh khubor (press statement) jong u, ha kaba u la ong ba yn ym lah shuh ban pynkylla ïa ki kyrtong namar baroh ki kyrtong ki dei kiba ka seng ka la dep ban peit bniah bha bad ïa ngi la pynkupbor da ka riti synshar jong ka seng bad ka rai jong ka seng ka dei ka rai ba halor duh.
“Na ka liang jong nga, ngam sngewthuh shuh mano shuh kita ki bor ba kham halor shuh shuh ne kiba kham hapoh kiba la shim biang ïa ka tiket kaba la dep pynbna paidbah,” ong u Bah Marbiang da kaba bynrap ruh ba “Halor kino ki daw ba ki la weng ïa nga, ngam don jingtip eiei namar kumba nga la ong ïa phi ba ka SEC ka khlem khot ïa nga ban ïakren ne ka khlem ai kano-kano ka ‘call on explanation letter’ hynrei ka la shu weng beit kumto.”
Shuh shuh u Bah Marbiang u la pynpaw ruh da kaba buh ïa ka jingkylli, ba lada kim ibit ïa u balei ki ai na ba sdang?
U la ong ruh, “Lada kim ai na ba sdang ngam lei-lei hynrei nga shim ba kane ka jingleh ïa nga ka dei ka jingpynkheiñ wat ïa ka hok longbriew-manbriew bad nga pyrkhat ba wat ka mynsiem ïatiplem ruh ka la ïap.”
U Bah Marbiang u la ong ruh ba halor ki daw bad ki nongrim jong ka jingshah weng ka jong u, kan khambha shibun ban kylli hi na ki nongïalam ka VPP.
Ha kawei pat ka liang, u Bah Marbiang u la pynpaw da kaba ong, “Kum uwei na ki nongshong shnong jong ka Nongstoiñ Konstitwensi uba don ka mynsiem ban shakri ïa ki paidbah lyngba i bor i barit eh hadien ba la mih ka seng VPP, nga la pynïasoh bad ka halor ka jingïohi ba ki don ki nongrim kiba biang. Hadien ba nga la pynïasoh nga la ïatrei ryngkat-ryngkat bad ka seng bad nga la aplai ïa ka tiket MDC naduh u bnai Naiwieng 2023 namar ka seng ruh ka nang pyrkhat ba ka ilekshon kan long ha u 2024 hynrei la pynjlan noh.”
U la ong ruh ba ka por ka la ïaid bad ha ka ilekshon MP ruh ki nongïalam VPP na Nongstoiñ ki la bynshet ha u ïa ki kam kiba khia bad u la trei shitom hi ruh ha ka ilekshon MP bad u la ong ruh ba “Nga ngeit ba u Organising Secretary jong ka Nongstoiñ ruh u kubur ïa kata”.
Shuh shuh u Bah Marbiang u la ong ruh ba ha u bnai Naiwieng ha ka 11 tarik 2024, “Ka State Election Committee ka la phah wan ïa nga bad ïa ki para nong aplai tiket ha ophis treikam ka VPP ha Laitkor bad ha katei ka sngi ha ka por 4.30 janmiet la pynbna ïa ka kyrteng jong nga ba nga dei u kyrtong ka seng na Nongstoiñ Konstitwensi bad hadien shi sngi ka jingpynbna tiket nga la phone ïa u President ka VPP bad ha kaba nga da kylli ruh ïa u ba la long ne em Bah ba ngan leit pynithuh noh ïalade ha ki lok ki jor, ki shnong ki thaw ba nga la ïoh tiket bad ka jubab ka jong u President ka la long hooid ka long.”
“Nga la ïaid kylleng ka Nongstoiñ Konstitwensi bad ha ka 2 tarik Nohprah 2024, u President u la phah wan ïa nga na ka bynta ka Orientation Program ha ophis treikam ka seng,” ong u Bah Marbiang bad bynrap pat ba kaba la pynlyngngoh ka long ba wat haduh kane ka sngi ba mynta, um don jingtip eiei ba halor kiei ki daw bad ki nongrim ba la weng noh ïa ka kyrteng jong u bad ban sei bujli da uwei pat.
Ha kawei pat ka liang, u Bah Marbiang u la ong, “Namar ka jingleh bad rai donbor ban pynduh jubor ïa ka tiket wat hadien ba ka State Election Committee kala dep jied hi bad pynbna ruh ïa ka kyrteng jong nga kum u kyrtong jong ka Nongstoiñ Konstitwensi lyngba ki lad pathai khubor pynban kala pynkheiñ hi ïa ka rai da kaba weng noh ïa ka kyrteng jong nga na ka jinglong kyrtong, kumta, ngam banse ban weng noh ïalade na ka jinglong dkhot jong ka seng naduh kane ka tarik ba nga soi ïa ka shithi ba nga la phah sha ki Nongïalam ka VPP.”
