Shillong, K’lyngkot 09
Ki kam shah prong tuh jong ki ïing, ki dukan bad ruh ka jingshah tuh jong ki kali bad arshaka, ka dang ïai bteng na kawei ka sngi sha kawei pat haduh ba ka la wanrah ïa ka jingbym shngaiñ shuh.
Katkum ka khubor ba la ïoh lum na ki pulit la ong na ka liang jong u Asharphi Ray u la ai ka jingujor ba ha ka 7 tarik mynta u bnai, ki runar bym lah ban tip ki dei kiei, ki la prong tuh hapoh ka ïing sah ka jong u kaba don ha 29 Cantonment, Goenka Market, Shillong bad ha kaba ki la ïoh ban tuh ïa ka ksiar bad ruh ka pisa kaba long T.17,000/-.
Ha kawei pat ka khubor la ong ba ha ka 7 tarik mynta u bnai ha ka por 9 baje mynmiet, ki pulit ki la ïohpdiang ka khubor ba ki runar bym lah ban ithuh ki la tuh ïa kawei ka arshaka kaba don ïa u registration number ML05-AD-3852 jong u Blondel L Nongpiur na ka jaka sah ka jong u, kaba don ha Langkyrding Lane-4, Shillong.
Kumjuh u Iaiskhem Shabong u la ujor sha ki pulit ba ha ka step jong ka 4 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-X-6809 na ka jaka sah ka jong u, kaba don ha Nongthliew Sharum ha Eastern West Khasi Hills.
Ha kawei pat ka khubor, u Vice Principal jong ka Industrial Training Institute kaba don ha Khliehtyrshi ha West Jaiñtia Hills u la ujor sha ki pulit ba ha ka 6 tarik mynta u bnai, u la lap ba ki runar ki la ïoh ban tuh ïa lai tylli ki CPU, lai tylli ki Keyboards, lai tylli ki Monitor, lai tylli ki battery, lai tylli ki shaka bad kawei ka ‘rim’ jong ka shaka.
