Shillong, K’lyngkot 09
Ka Synjuk ki Rangbah Kur ka Bri u Hynñiewtrep ka la pyntip bad pynbna paidbah ba ka jingïalang ba kyrpang ba khot da ka KHADC na ka bynta ki Hima, ki Dorbar Shnong, ki Rangbah, ki Seng/Dorbar Kur, ki Seng Kynthei bad ki Seng Samla ka Khasi Hills District, kan long ha ka 18 tarik Kyllalyngkot (January) 2025, por 10:30 mynstep ha Madan Polo, Shillong.
Kane ka jingïalang ka long kaba kongsan bad thikna ban pynshai halor ka jingpyntreikam ïa ki aiñ thymmai ka KHADC 1. Ka Administration of Elaka Amendment Act 2023 bad ka Khasi Social Custom of Lineage Amendment Act 2023 ban pynïar ïa ka lariti jong ka jaidbynriew Khasi-Jaiñtia. Ka Dorbar kan long ruh ka lad ban pynpaw ïa ka iktiar bad ka jingïatylli jong ki paradoh parasnam Khasi-Jaiñtia ban ïada ïa ka riti bad dustur ai jait kmie bad ka synshar shnong trai ri bad ban pynneh pynsah ïa ka jinglong kyrpang jong ka jaidbynriew.
Kumta la kyntu ïa baroh ki Rangbah Kur ki Kur bapher bapher ha Rilum Khasi bad Jaiñtia ban ïa wan shit rhem sha kane ka Dorbar Iktiar Paidbah kum ka dak jong ka jingkitkhlieh bad jingïatylli halor ki nongrim ka jaidbynriew Khasi Jaiñtia.
La kyrpad ruh ban ïa wer lang ïa ki para kur, ki nongkitkam shnong bad ki Seng Kynthei bad Seng Samla kumba la kdew haneng ban ïa mih ryntih ban ïashimbynta ha katei ka sngi bad la kumno-kumno dei ban wan 10 ngut na kawei-pa-kawei ka kur.
