Shillong, K’lyngkot 09
Ka jingkyrduh um ha ki shnong ha Mawlai ka dei kawei ka jingeh kaba ki nongshong shnong ki mad shi kat dei namar ka rukom sam ïa ka um kam long kaba biang.
Ïa kane la sakhi namar ki don ki jaka ba ka um ka shu pahuh bad lait ei khlem don kiba pyndonkam.
Ki don ki jaka katto-katne ha Mawlai ha kaba ka um sorkari ka heh bha bad shu tuid ei ha ki kor um namar ym don ba lah shuh ban pyndonkam. Katba ki don pat bun ki jaka ha Mawlai kiba kyrduh um bad wat ka um sorkari kaba pynpoi lyngba ki kor um paidbah ka long kaba rit haduh katta-katta.
Ha kum kita ki jaka, ki nongshong shnong ki hap ban shu thied ïa ka um bad kane ka la ktah shi kat dei ïa kiba bun ki longïing kiba duna ka ïoh ka kot.
Wat ka um kaba sam ka tnat PHE ha man la ki thliew ïing ka long kaba duna khamtam kito ki longïing kiba don kham bun ngut, katba na ka bynta kito ki longïing kiba don tang khyndiat ngut lehse ka um ka la kham biang ba kin pyndonkam.
Kum ka nuksa, ka um kaba sam lyngba ka Umsohlang Water Supply Scheme, ki don ki dong bad ki shnong ha Mawlai kiba ïoh duna bha ka um ha ki kor um namar ka rukom sam ïa ka um kam biang.
Ka don ruh ka jingeh ïa ki briew na tnat PHE ban pynbiang ïa ka rukom sam um khamtam ïa ka um kaba pynpoi sha ki thliew ïing namar kito ïing kiba don kham sha them ki ïoh kham bun ka um namar ka tuid sted bad kham heh, katba ki ïing kiba don ha ki jaka ba kham madan, ka um ha ki pipe ka tuid suki bad kam heh kumba heh ka um kaba tuid sha jaka them.
Haba ïakren bad katto-katne ki nongshong shnong, ki kubur ba ki don ki jaka ba ka um ka heh bad ki don ki jaka ba ka um ka rit. Ki la kyntu ïa ki briew ka tnat PHE ban khmih lem ïa kane ka jingeh khnang ba ka rukom sam ïa ka umbam umdih kan long kaba ïabiang lang.
“Ki don ki dong bad ki shnong ba ka um ka mih da ki bun kynta ha ki kor um haduh ba ym don shuh kiba tong um hynrei la don pynban sa kiba leit phler jaiñ, bad ka um ka shu lait ei kumto lada ym don ba tan da u pipe. Ki don pat ki jaka ba ka um ha ki kor um ka long kaba rit bad kito kiba leit ap pali ha kor um ki shu ap lynga bad don ka por ba ka um ka shu jah noh,” la pynpaw ki nongshong shnong.
