Shillong, K’lyngkot 10
Ka kynhun jong ki nonghikai ka skulbah North-Eastern Hill University (NEHU) kiba don hapoh ka synjuk jong ka North-Eastern Hill University Teacher’s Association (NEHUTA), ka la pynpaw ïa ka jingpynrem kaba jur halor ka jingwan tuklar jong u Vice-Chancellor ka Skulbah, Prof. Prabha Shankar Shukla ïa ka jingïaid beit-ïai ryntih jong ka skulbah da kaba pyndonkam bakla ïa ka bor jong u haduh ba katto-katne ki kam ba thikna ki la shah pynwit bad shah pynthut.
Ha u kyrwoh ba la phah da u Vice-President, NEHUTA bad General Secretary, NEHUTA sha ki lad pathai khubor ha ka 10 tarik Kyllalyngkot, 2025, katei ka kynhun jong ki nonghikai ka skulbah, ki la ong ba kane ka jingwan tuklar biang jong u Vice-Chancellor ka long kaba palat ïa ka hok na ka liang jong u bad namar ka jingpep bad shim shuti na ka kam kaba la pynlong ïa ki samla pule jong ka skulbah ba kin buh ïa ka jingpynbor kaba dang ïai bteng haduh mynta sha ki bor synshar ban weng noh mardor ïa utei u Vice-Chancellor napoh ka skulbah.
Ka NEHUTA ka la ong ba wat la u don ha ka shuti ha ka jingai jingmut jong ki bor synshar, hynrei utei u Vice-Chancellor u dang ïai pynthut biang ïa ka jingtreikam kaba man la ka sngi jong ka skulbah khnang ba ka jingthmu synshar donbor jong u kan shah pynbor ha man la ka kam, ki kamram bad ki bor jong u Vice-Chancellor uba dang pyndep ïa kine ki kam baroh kumba la bthah da ki aiñ jong ka skulbah.
Ka NEHUTA ka la ong ruh ba wat la ïa u Prof. Prabha Shankar Shukla la ai jingmut ban leit shong shuti da ki bor ba dei peit, hynrei une ujuh u briew u la don bynta pat ha ka ban leit mihkhmat ïa ka skulbah ha ki katto-katne tylli ki jingïalang, bad kane ka jingleh jong u ka long ka bym ïahap satia bad kaba pynkheiñ ïa ka aiñ jong ka skulbah.
“Ha ka shuti, um don hok ban mihkhmat ïa ka Skulbah katkum ki Aiñ jong ka Skulbah. Namarkata, u Prof. P. S. Shukla u pyrshang ban kham palat ïa ka Aiñ bad ki Riti bad ban pynkheiñ ruh ïa ki kyndon treikam”, ong ka NEHUTA.
Kumta, na ka liang ka NEHUTA ka la pynrem jur ïa kum kine ki jingwan tuklar khlem nongrim jong u Prof. P.S. Shukla bad ong ba ki jingjia jong ka jingpynthut biang da u Prof. P.S. Shukla ki pyni haduh katno u shah pynthut ha ka jingïakhih kaba dang ïaid shakhmat kaba dawa ban weng noh ïa u na ka kam bad ka pyni ruh ba u Prof. P.S. Shukla u pyrkhat ba ka jingsngew sarong jong u ka kham halor ban ïa ka Skulbah.
“Ka jingpynïaid bakla ïa baroh ki jait kam, ka jingthung ïa ki briew ki bym tbit bad ki bym biang ha ki kam ba kongsan, kaba la mih ruh ka jingong da ki kynhun ïakhih ba kine ki jingleh u Shukla ki long kum ki jingpyrshah ïa ki Jaitbynriew Riewlum bad pyrshah ïa ki trai ri-trai muluk bad baroh kiwei pat ki jingpynkheiñ ba bud ryntih ïa ka Aiñ jong ka Skulbah, ki Aiñ bad ki kyndon kiba lum lang ha ka jingkulmar bad ka jinglehbeiñ ïa ka jingkitkhlieh, ka jinglong hok, ka jinglong khuid, ka jingïaryngkat bad halor jong baroh la thaw ïa ka jingpynïaid bakla ïa ka pule puthi, ka jingsynshar bad ka pisa tyngka kaba lah wanrah ïa ka jingsniew kaba khraw ïa ka nam bad ka kyrteng jong ka NEHU”, ong ka NEHUTA.
Ka NEHUTA ka la ong ba ha kajuh ka rukom, u Prof. Shukla u pynbud biang ïa ka jingpynjot ïa ka jingtreikam kaba kongsan jong ka NEHU khlem kano-kano ka jingkitkhlieh ïa ki jingma kiba lah ban mih na kane.
“Ka NEHUTA, namarkata, ka ïohi ïa ka rukom ha ka jingpyrshang ba shyrkhei jong u ban pynthut ïa ka NEHU na shabar khnang ba yn lah ban pynjulor tyngeh ïa ka NEHU. Kine ki kam pynshitom beiñ jong u Prof. Shukla kin pynlong ïa u ban kham don jingkitkhlieh namar ba u dang ïakynduh ïa ka jingtohkit bad baroh ki kam sniew jong u mynta ki don hapoh ka jingpeit bniah”, bynrap ka NEHUTA.
