Jowai, K’Lyngkot 10
Ka jingpynrung ïa ka shnong Tangnub kaba don ha East Jaiñtia Hills District hapoh ka Saipung-Nongkhlieh Konstitwensi wat hadien ka jingpyrshah ka la pynlong ïa ki nongshong shnong kumba shispah ngut jong kane shnong ban leit rah lama ïong bad ‘placard’ bad pyrta hylla pyrshah ïa ka JHADC bad ka Sorkar Jylla ha ka shlem treikam jong ka JHADC, Jowai ha ka Sngi Thohdieng.
Kitei ki nongshong shnong hapoh ka jingïalam jong u Waheh Shnong, Bah Alfund Sutnga ki la pynpaw ïa ka jingbitar pyrshah ïa ka JHADC bad ka Sorkar Jylla namar wat hadien ka jingpyrshah jong ki ha ka ‘Public Hearing’ kaba la long ha Khliehriat hynrei ka JHADC ka la ïaid shakhmat ban pynrung ïa ka shnong jong ki ha Saipung-Nongkhlieh Konstitwensi.
Ki nongshong shnong ki diaw namar ba ka Saipung-Nongkhlieh Konstitwensi ka dei ka konstitwensi ba kham bun ki nongthep ‘vote’ na ka jaidbynriew Baite bad la mihkhmat ruh da u MDC na jaidbynriew Baite.
Ki nongshong shnong ki la shim ruh ïa ka rai ban ‘boycott’ ïa ka ilekshon MDC namar kim hun ïa ka jingpynrung jong ka shnong jong ki sha Saipung-Nongkhlieh Konstitwensi.
U majistor bad ki pulit ki la poi bran-bran sha JHADC ban teh lakam ïa katei ka jingïakhih jong ki nongshong shnong ka Tangnub.
Namar ka jingbym don u CEM jong ka JHADC, u Waheh Shnong bad katto-katne ngut ki nongïalam shnong ki la leit ïakynduh ïa ka Secretary jong ka JHADC ban kyrpad pynphai biang ïa ka shnong jong ki sha ka konstitwensi barim ka Sutnga-Nongkhlieh Konstitwensi hynrei na ka liang jong ka Secretary ka la ong ba ka bor ka shong ha ka Executive Committee.
Hadien kata ki nongshong shnong ki la rai ban sah miet noh ha JHADC bad leit phai ïing haduh ba ki la ïakynduh ïa u Chief Executive Member, Bah Thombor Shiwat.
Hynrei hadien ka jingtuklar jong u SP ka West Jaiñtia Hills District, Bah Chemphang Syrti, ki nongshong shnong ki la mynjur ban leit phai ïing.
