Jowai, K’lyngkot 10
Ka Dorbar Shnong Mukroh Pyllun, West Jaiñtia Hills District ka la rai ban ‘Boycott’ ne kyntait ïashim bynta ha ka ilekshon MDC sha Jaiñtia Hills Autonomous District Council (JHADC) ka ban long ha ka 21 tarik Rymphang.
Ïa kane ka rai, ka Dorbar Shnong Pyllun jong ka Dorbar Shnong ka la shim ha ka jingïalang kaba la long ha ka 9 tarik Kyllalyngkot ha Madan Musher, Mukroh kaba la wan ïashim bynta da baroh ki nongshong shnong.
Halor kane ka rai, ka Dorbar Shnong Mukroh Pyllun ha ka 10 tarik Kyllalyngkot ka la pyntip da ka jingthoh ha u Deputy Commissioner, West Jaiñtia Hills District, Bah B.S. Sohliya, IAS.
U Secretary ka Dorbar Shnong Mukroh Pyllun, Bah Precioustar Sten haba kren sha ki lad pathai khubor u la ïathuh ba ka daw ba kin ‘Boycott’ ïa ka ilekshon ka long halor ka jingleh jubor ka KAAC, Assam ïa ka shnong Mukroh da kaba tei be-aiñ ïa ka Assam Forest Beat House, ka jingshna jubor ïa ka surok na Khlieh Sanaro, Mukroh sha Umlaphiah, Mukroh.
Nalorkata, ka KAAC ha u Naiwieng 2024 ka la thombor biang ïa ka shnong da kaba shna ïa ka surok bad thom ïa ka jaka shnong ha Salang, Mukroh bad haduh mynta mynne ka Sorkar Meghalaya kam lah ban pynsangeh ïa kane ka jingthombor ka KAAC.
Kumjuh ka jingbym shngaiñ ki nongshong shnong ban leit bri namar ka jingshah pyntieng pynsmiej jong ki bor ka Assam bad ka jingbym ïoh ka shnong ïa ka jingbishar kaba hok halor ka jingshah siat ïap jong san ngut ki dkhot ka shnong ha ka 22.11.2022.
Halor baroh kine ki jingeh kiba ka shnong ka la ïakynduh, u Bah Sten u la ong ba ka bor shnong ka la dep ban pynsngew bad kyrpad ïa ki bor jong ka Sorkar ban ïarap ai jingïada ïa ka shnong, hynrei haduh mynta ka shnong ka dang hap ban im ha ki juh ki jingeh.
Kumta halor kine ki nongrim u la ong da kawei ka sur ka Dorbar Shnong ka la sngewdei ban ‘Boycott’ ïa kane ka MDC ilekshon kum ka dak ban pyni sha ka Sorkar ïa ki jingeh jong ka shnong.
U la pyntip ruh ba ka rai jong ka Dorbar Shnong ka long ba lada ka Sorkar ka donkam ban ïakren halor ban weng ïa kane ka ‘Boycott’, kan hap ban wan ïakren bad u paidbah ha ka Dorbar Pyllun jong ka shnong ym tang ha ki nongïalam shnong.
