Shillong, K’lyngkot 10
Ka Kynhun Myntri jong ka Sorkar Jylla ka la ai jingmynjur ïa ka CM- ASSURE scheme, ka prokram ban ïarap pynïoh ïa ka ïew ka hat kaba pynleit jingmut kyrpang eh sha ki mar rep bym pyut.
Kane ka skhim ka dei da ka jingthmu ban weng ïa ki jingeh jong ka jingkylla ka dor ka mur ka ba ktah ïa ki nongrep ba rit bad ba heh ha Meghalaya, khamtam ha ka por ba hiar bha ka ïew ka hat.
Haba kren hadien ka jingïalang jong ka Kyn-hun Myntri kaba la long ha ka sngi Thohdieng ha Sohra, u Myntri Rangbah ka Jylla, Conrad K Sangma u la ong ba ka Sorkar ka la rai ban mang pisa T.100 klur ban tuklar ha kum kine ki khep khnang ba ki paid nongrep ha ba ki shem jing-eh, kin ïoh ïa ka jingkyrshan bad jingïarap.
U la ïathuh ba yn sa mang pisa ruh T.100 klur ban pynsuk ïa ka thied ka pet bad ban siew ïa ki jinglut jingsep ha ka jingtreikam jong ki bor ba dei khmih.
“Ngi la ïoh ruh ïa ka pisa T.20 klur na ka ka tnat Tribal Affairs jong ka Sorkar Pdeng ban ïarap shuh shuh ïa kane ka prokram namar ka Sorkar India ruh ka la ai ïa ka skhim, hynrei ka pisa ka long kaba duna. Kane kan dei ka pisa ka ban ïaid kylleng namar ngin thied ïa ki mar bad lyngba ki Market Board, ngin sa die ïa ki bad kan sa wanphai biang sha kane ka jylli, ha kaba ngin pynïaid biang ïa ka ha kane kajuh ka rukom nalor ba ngin ai jingïarap sha ki nongrep ha ba ki donkam, khamtam na ka bynta ki mar rep bym pyut”, u la ong.
U Myntri Rangbah u la ong ruh ba ki jingeh ba la mad da ki nongrep synsar bad nongrep kwai ruh yn sa leh eiei mynta u snem hapoh kane ka skhim.
“Ki nongrep synsar ki mad ïa shibun ki jingeh, ki la wan ïakynduh ïa nga. Ki nongrep synsar na East Khasi Hills ki la wan ïakynduh ïa nga la ar bnai eiei bad dei kane kaba la pynpyrkhat ban wanrah ïa kum kane ka prokram ban ai ïa ki jingïarap ha ka por ba ki shah lynshop bad shah pynjulor”, u la ong.
U Conrad u la ong ba ka Sorkar ka la ïohi ïa ka dor ïew jong u synshar bad ka dor ïew jong u kwai ha kine ki khyndiat snem ki long ki bym neh kumjuh, bad kane ka dang ïai bteng haduh mynta.
U la ong ba ka Sorkar ka sngew donkam bha ban don ka jingtuklar ha ka ban thied ïa kine ki mar bad ban die pateng ïa ki, ïa kaba yn sa leh lyngba ka Marketing Board.
Haba kdew ba ka Sorkar ka la wanrah ïa bun tylli ki prokram, ki polisi bad ki skhim ban kyrshan ïa ki nongrep, u Myntri Rangbah u la ong ba ka Sorkar ka la seng ïa ki processing unit khnang ba ki mar rep ba lah ban pyut jong ki nongrep kin ym shu duh ei.
“Ngi la seng palat 200 tylli ki processiong unit, 30 tylli ki dei ki unit kiba heh ha kaba yn kyrshan ym duna ïa kumba 5000 ngut ki nongrep. Kine ki skhim ki la mih ban ïarap pynmih mar na ki mar rep kiba lah ban pyut, kum ka nuksa lada phi don ïa ki jait soh bapher bapher ba la pynkylla sha ki chip, powder, ice cream”, la ong u Myntri Rangbah.
