Shillong, K’lyngkot 10
Ka kynhun tem ‘Snow White’ ha ryngkat ka jingïatreilang bad ka Seng Samla Riatsamthiah ha ka Sngi Thohdieng ka la pynlong ïa ka ‘Tribute Concert’ kum ka jingkynmaw burom ïa uwei na ki dkhot jong ka, u Bah Manfilson Lyngdoh (Bam Kwai ha Dwar U Blei) ba ju khot ieid ‘Bah Hep’ uba la khlad noh ha u snem 2017.
Ïa kane ka ‘Tribute Concert’ ba la pynlong ha Riatsamthiah la kyrshan lang da ka Dorbar Shnong & Meghalaya Aids Control Society.
Kane ka long ruh shi bynta jong ka jingdap 25 snem ka kynhun tem ‘Snow White’.
U Bah Hep u dei uba tem ïa ka ‘Lead Guitar’ jong kane ka kynhun ha katei ka por bad u long ruh uba paw bha.
Haba kren ha katei ka sngi, u Rangbah Shnong u la ong ba ka phang pdeng jong ka ‘Concert’ ka long ‘SAY NO TO DRUGS’ – kaba long ruh ka lad ba bha tam ban ai burom ïa u Bah Manfilson Lyngdoh uba ka Riatsamthiah ka sngew sarong na ka bynta ka jingsynñiang jong u sha ka put ka tem.
