Nongstoiñ, Nailar 03
Ha ka sngi Nyngkong jong ka taiew ki paid nongshong shnong ka Mawrok Porsohsat ha West Khasi Hills District bad ki shnong ba marjan ki la ïamih paidbah ban pynpaw ïa ka jingpynrem kaba jur ïa u runar thrang snam uba la tip kyrteng kum u Koldingstar Thongni, 22 snem ka rta uba la thombor ïa ki shikurim haduh ba u kthaw kurim u Bah Elbin Kharbani, 60 snem ka rta u la duh noh ïa la ka jingim, kaba la jia myn ha ka miet jong ka 31 tarik u bnai ba la lah.
Ïa ka jingïaid paidbah la pynlong da ka Synjuk Hynñiew Shnong ha ryngkat ki kynhun sengbhalang bad sdang da kaba ïaid kjat naduh lailad jong ka shnong Nongsohpian ter ter shaduh ka madan shnong Mawrok Porsohsat bad la pynkut pat da ka jingïalang paidbah kaba lyngkot ha katei ka madan shnong ha kaba haduh 8 tylli ki shnong ki la wan ban ïashimbynta ha katei ka rally kiba kynthup ïa ka shnong Pyndenglawar, Nongryntong, Syllei-Ïawkheiñ, Dom kohsam, Nongsohpian, Nongspung, Phot Jaud, Mawrok Porsohsat bad kiwei kiwei.
Shuh shuh ha katei ka sngi la wan ïashimbynta lang ruh bun ki riew rangbah jong ka thaiñ kiba kynthup naduh ki nongïalam shnong, ki seng longkmie, seng samla, seng Rangbah ki la mih paidbah lang bad ban ai jingkren da ki kyntien ban pynrem jur ïa utei u runar thrang snam.
U Bah Pynroilang Nongsiej, Sordar ka shnong Mawrok Porsohsat haba ai jingkren ha ka jingïalang u la ong ba na ka liang jong ka shnong ka dap da ka jingsngewdiaw bad ka sah ha ka um dum haba kum kane ka jingjia ka wan jia hapoh ka shnong hynrei yn leh kumno ka kam kala dep jia bad na ka liang jong ka shnong kam shim ïa kane ka jingjia tang kum ka kam runar ne ka kam dakaid hynrei kala dei ka kam jong ki riew thrang snam ha kaba la shu wan thombor bad dkhat jubor ïa ka jingim im katba dang ïoh thiah lyngngai.
Shuh shuh u la ong ba na ka liang jong ka shnong ryngkat ki paidbah kiba wan sha katei ka rally, ki phah ïa ka jingsngewlem sha ka longïing bad ha kajuh ka por ka shnong ka kyrpad ïa ka tnad pulit ba kin shim ïa ka jingtohkit kaba bniah ban pynshitom bad set along ïa u riew thrang snam shi jingim bad ban ai ka jingbishar kaba hok ïa katei ka longïing.
U Samla Bansaiñdur Nonglait uba mih khmat na ka VDPCNA u la ong, barabor ki jingsniew ki sdang shwa na la shnong bad na la ïing lyngba ki kam kiba rit kum ki jingïashoh ïa dat, kam tuh kam thiem bad kiwei kiwei bad lada ym shimkhia ki nongleh kam sniew kin nang ïoh mynsiem bad shlur ban leh sa ïa ki kam kiba kham pyntriem.
U la ong ba lada ai jem palat nangne shakhmat kan nang sniew kumta dei ka kamram jong baroh ban ai da kaba tyngeh ïa ki nongleh kam sniew.
U President ka HYC WKHD Samla Lumlang Kharsyiemlieh u la ong, “Ngi ïohi katba nang mih ki sngi ka nang jngai ki kyntien sneng jong ki longshwa hapoh jong ka jaidbynriew ka jong ngi.”
U la ong ruh ba na ka liang ka HYC West Khasi Hills District hi baroh kawei ka phah ka jingsngewlem ïa ka ïing ka sem u Bah Elbin Kharbani (bam kwai ha duwar U Blei) ba u la duh noh ïa la ka jong ka jingim ha u riew thrang snam.
Shuh shuh u la ong ruh ba halor kane ka jingjia na ka liang ka seng kala ïatreilang bad ïakren bad u SP bad la ïohi ïa ka jingtreikam wut wut na ka liang jong u, bad ka kynhun pulit ban ïoh noh ïa une u riew thrangsnam kaba la ïarap ban nym pyntyrha ïa ka mynsiem khamtam ïa ki nongshong shnong jong ka dong ka thaiñ.
Ka Kong A Kharsyntiew na ka Seng Longkmie New Nongstoiñ kala ong, “Ngi dei ban ïeng na ka bynta ka hok bad ban ïeng pyrshah na ka bynta ki kam thombor bad ngi dawa ba ka Sorkar ka dei ban ai ka jingbishar hok namar ka Sorkar ka dei kaba hakhlieh duh ban peit bad tehlakam ïa ki aiñ.”
Shuh shuh ka Kong A Kharsyntiew kala phah ruh ïa ka jingsngewlem sha katei ka longïing bad ha kajuh ka por ka phah ruh ïa ka khubor sha u Koldingstar Thongni ba un kylla noh kaba mut ha la ka jaka ba u shong shah pynshitom.
Kiwei kiwei kiba ïadonlang bad ai jingkren ha katei ka sngi ki kynthup ïa u Bah D. Sun President ka WKSU, Bah Moslandar Marngar, Bah Eric Kharsyntiew bad kiwei-kiwei ki riew pawkhmat ka thaiñ Nongstoiñ bad ïa katei ka jingïalang la pynïaid da u Bah Sirian Wahlang, Sordar Shnong Nongsohpian.
