Kiew Secretariat biang ki Pharmacist bym sngap ka Sorkar ïa ki jingdawa

Shillong, Nailar 03

Ki nongïalam ka All Meghalaya Pharmacist Association (AMPA), ha ka 03 tarik u Nailar, 2026, ki la kiew biang sha Secre-tariat ban kynduh ïa u Conrad K Sangma, Myn-tri Rangbah ka Jylla, ban pynkynmaw halor ki jingdawa jong ki, kiba la ïaid mynta la bun-bun snem.

Namar ka jingbymdon u Myntri Rangbah, na ka liang ki nongïalam ka Association, ki la hap ban aiti ïa ka shithi ha ka ophis treikam jong u.

Haba kren sha ki lad pathai khubor, u Bah Emos J. Syiemlieh, nongaiktien u la ong, ba na ka liang ka Association, ka dap da ka jingsngewkhia namar ba ki la buh ïa ka ‘appointment’ ha u Myntri Rangbah ka Jylla mynta la lai snem tam ei-ei hynrei haduh mynta, u khlem ai kano-kano ka jubab.

U la ong ba ki jingdawa jong ka Association naduh nyngkong ki long hi, ban pyntreikam ïa ka Meghalaya Pharmacy Council (MPC) Election and Meghalaya Pharmacist Service Rules, 2025, ka rukom thungkam ïa ki Pharmacist, ban kyntiew ïa ki ‘drug inspector’ nalor kiwei-kiwei pat ki mat ba kongsan.

“Ngi la pyrshah ïa ka Service Rule ha u snem 2024 hynrei ka Service Rule kaba pynmih mynta pat de ka long kumjuh bad ka Service Rule kaba ki la dep pyrshah,” u la ong.

U la ong ba ki Pharmacist kiba don haduh mynta ha ka kam ki don tang 231 ngut, la ka long ha ki hospital, ki CHC, PHC bad kiwei.

U la ong ba ki don haduh 1,800 tam ki Pharmacist ha ka Jylla, hynrei ka Meghalaya Pharmacy Council ka khlem pynthymmai ne update ïa kiba la dep pynrung kyrteng.

Nalor kata, u la ong ruh ba lada ka Sorkar kam sngap kin hap ban shim pat da kiwei ki sienjam nangne shakhmat.