Mawkyrwat, Nailar 03
Kum ka dak ban pynpaw ïa ka jingsngewlem bad ban pynrem jur halor ka jingsuba shah pynïap ka Kong Joit Kharlyngdoh, 76 snem ka rta na ka shnong Jakrem, South West Khasi Hills District, ka Dorbar Shnong Jakrem ka la pynlong ïa ka Peace Rally ïa kaba la sdang na ïew Mawleiñ – Mawrangkynda bad la pynkut ha Madan Pyndenkseh.
Ha kane ka Peace Rally la wan ïashim bynta da ki paidbah nongshong shnong ryngkat bad ki nongïalam shnong kiba la pynpaw ïa ka jingpyrshah ïa kane ka kam runar bad ki la kyrpad ïa ki bor ka aiñ ba kin pynsted ïa ka jingtohkit khnang ba kiba donkti ha kane ka kam kin shah kem bad ïoh ïa ka jingbishar kaba hok katkum ka aiñ.
Ha kane ka jingïaid paidbah, ki nongïashim bynta ki la rah ruh ïa ki plakad bad pyrta da ki kyntien ban pynrem ïa kane ka jingjia kaba sngewsih, da kaba pynpaw ïa ka jingangnud ba ka jingshongsuk shongsaiñ hapoh ka shnong kan ïai neh bad ba kum kine ki jingjia kim dei shuh ban jia shuh hadien habud.
Kum ban shu kdew ka Kong Joit Kharlyngdoh ka la jah na ïing naduh ka 4 tarik u Naitung, 2026 bad la lap pat ïa ka da ki briew kiba wad tit ha ka 20 tarik u juh u bnai na kawei ka khlaw kaba hap hapoh ka shnong Jakrem kaba tip kum ka Motbih Pamske.
