Jowai, Nailar 03
Ka Jaiñtia Students’ Union (JSU) ha ka 3 tarik Nailar kala dawa ban pyndam noh mardor ïa ka public hearing jong ka Shree Cement Limited kaba la long ha ka 31 tarik Nailar ha Lum Syrman.
Ka seng hapoh ka jingïalam u President Bah Jersom Shylla, kala ïakynduh ïa u Chairman/ Member Secretary State Environment Impact Assessment Authority (SEIAA) R. IFS (Nainamalai), kumjuh ïa u CPCB Scientist Arnab Mandal bad Deputy Commissioner ka East Jaiñtia Hills ban aiti dalade ïa ka dorkhas bad ban dawa ïa ka jingkitkhlieh.
Ka JSU kala ai por 10 sngi na ka bynta ki bor synshar ban shim ïa ki lad ki lynti kiba rai ban pynbeit bad lada ym lah ban pynbeit, ka Seng kan hap ban leit wat shaduh ka National Green Tribunal (NGT) bad ka High Court jong ka Meghalaya, bad ban sdang ïa ka jingïakhih paidbah kaba jur pyrshah ïa ka Sorkar.
Ka JSU kala ong ba ïa ka public hearing la leh tang dep khlem da bud ïa ki kyndon bad kaba neh tang 45 minit da kaba thmu ban khanglad ïa ki nongrep bad ki trai jaka kiba pyrshah, katba la pdiang tang ïa ki briew kiba la mynjur lypa.
Shuh shuh ka JSU kala ong ba ka jingïasuh buit naduh ka Sorkar, ki pulit kiba la leh pyrshah aiñ ban khang ïa kiba shah ktah ban leit sha ka public hearing da kaba khanglad ïa ki ha lad Shnongrim, bad wat haba u DC EJH u la pynmih ïa ka hukum ban ailad ïa ki nongïashim bynta.
Nalor kata, kila tih bad shna thliew ïa ki surok khnang ban khanglad ïa ki nongpyrshah ban ïashim bynta ha ka public hearing kat haduh ba la shah ktah kawei ka longkmie suhkhun.
Kumta ka JSU ka dawa ban pyndam noh ïa katei ka Public Hearing kaba la dep ban pynlong bad ban kyntait ïa baroh ki Clearance ba la ai bad ban pynlong sa shisien ïa ka public hearing kaba laitluid bad ban thung da ka High-Level Inquiry ban tohkit ïa ki ophisar ka MSPCB bad ki pulit ka District ki bym la leh ïa ki kam jong ki.
