Shillong, Nailar 03
Ka Hynñiewtrep Youths’ Council ha ka lah Sngi u Blei ka la pynshai ba ka don ïa ka hok ban kren ïa ki mat kiba ktah ïa ka North-Eastern Hill University (NEHU) bad kdew ba ym dei tang ka Statutory Body ka ban peit ïa ka bha ka miat ka Skulbah, hynrei baroh kiba don bynta lang namar kiba bun ki College kiba pynïasoh sha ka Skulbah, kumta lada bakla ka rukom pynïaid kan long ka jingkulmar ïa baroh ki jaka pule.
Ïa kane la pynshai da u President ka HYC u Bah Roy Kupar Synrem, halor ka jingkren u Prof. Lakhon Kma President ka NEHUTA ïa ka jingdawa ka HYC haba ïadei ka jingthung Vice-Chancellor hapoh katei ka Skulbah.
Halor ka jingong u Prof. Kma ba ka HYC ka leh Politik bad ka jingbym wan sngewlem ka HYC ha ka por ba ki samla ki pynlong jingshah thngan ha NEHU, u Bah Roy u la ong ba ki dkhot ka seng ha kito ka por ki la leit ban ai mynsiem ban ïadon ryngkat bad ki samla pule ba pynlong ïa ka jingshah thngan, u la ong ba kam da donkam eh ban da pynbna ne pynpaw pyrthei ba ka HYC ka leit ha kito ki por ban ai mynsiem ïa ki samla pule bad bynrap ba ka HYC naduh mynshwa haduh mynta ka dang don ha syndah ki samla pule ban ïatreilang ha kano-kano ka por.
Shuh-shuh haba ïadei ka jingong u Prof. Kma ba la thung ïa u Prof. Barik kum u VC naduh ka 22 tarik Naitung bad ka jingthung ïa u ka dei ka jingthung thymmai, u Bah Roy u la ong ba ïa ka shithi thungkam la phah da u Under Secretary jong ka Sorkar India sha u Registrar ka NEHU, kaba ong ba ka Visitor ka NEHU ka la mynjur ïa ka jingtyrwa na ka bynta ban aiti VC bad ka khlem ong ba kan thung thymmai ïa u VC.
Ha kaba ïadei ka jingong ba u Prof. Khongsdier um shym la treh ban pynïaid ïa ka NEHU ha ka por ba don ka jingkulmar wat haba ki la dep khot laisien, u Bah Roy u la ong ba ym don ki ban ong ïa u Prof. Khongsdier ban shimti ïa ka kam Acting VC hadien ba u Prof. Shukla u la shongthait.
Shuh-shuh u la ong ba ha kito ki por ba ki ong ïa u Prof. Khongsdier ban shimti ban peit ïa ka NEHU kam pat kut ka samoi treikam jong u Prof. Shukla, kumta u la buh jingkylli ba kumno un shim ïa kane ka kam haba ka tnad pule puthi kam shym la ai ha u ïa ka bor ban shimti ïa kane ka shuki.
U Bah Roy u la pynpaw ba ka jingmih ka HYC ban ujor sha u Lat ka Jylla haba ïadei kane ka mat ka long namar ka jingsngewkhia, “Lada ka rukom ban thung ïa u khliehduh ban pynïaid ïa ka skulbah ka la bakla lypa, la pynkheiñ lypa ïa ki kyndon kiba ka NEHU ka don, ngin dang khmih lynti aiu shuh, namar lada kulmar hapoh NEHU kan ktah lut ïa ki khynnah kiba pule ha ki kolej bapher-bapher” u la ong.
