Nongpoh, Nailar 03
Ka Hills Farmer Union (HFU) hapoh ka jingïalam jong u Bah Alfonbirth Kharsyntiew, Secretary Sengkmie ha ka sngi Nyngkong ka hiar sha Byrnihat ryngkat bad ki nongïalam ka seng ban thad madan halor ka jingkynnoh lum khajna be-aiñ ïa ki kali kit mrad ha katei ka thaiñ wat hadien ba ka seng kala dep ban dawa ba dei ban sangeh noh mardor ha kine ki khyndiat por ba la dep.
Ki nongñiah kali pick-up kiba kit ïa ki mrad, kiba la ïoh ban ïakren, ki la ïathuh ba hashwa ba kin ïoh ban ïaid bad pynpoi ïa ki jingkit ki jong ki, ki hap ban phah shwa ïa u number kali bad siew T.4 hajar kum ka bai entry bad ïoh pat ban ïaid. Ki la ïathuh ruh ba kino-kino ki bym siew ïa ka T.4 hajar ka bai entry, kin nym ïoh satia ban ïaid bad pynpoi ïa ki mrad sha ka jaka kaba ki thmu.
Kitei ki nongñiah kali ki la pynpaw ruh ba kane ka jingkhrong pisa be-aiñ ha Byrnihat kala buh jingeh shikatdei ym tang ïa ki nongñiah, hynrei wat ïa ki trai kali ruh kumjuh kiba shah pyndik na ka por sha ka por.
U Bah Alfonbirth Kharsyntiew u la pynpaw ïa ka jingsngewsih ban ïohi ba katei ka jingkhrong pisa be-aiñ na ki kali kit mrad ka dang ïai bteng haduh mynta wat hadien ba ka seng ka la dep ban dawa ba dei ban sangeh noh mardor ïa kane ka kam beaiñ.
U la pyntip ruh ba ha kane ka sngi, ka seng kala pyrshang ban leit kynduh markhmat bad u Officer in Charge (OC) ka thanad Byrnihat ban pan jingshai halor katei ka jingkhrong pisa, hynrei kim shym la ïohlad satia ban kynduh naba u OC um don satia ha thanad.
U Bah Alfonbirth u la buh jingkylli ruh ba ka seng ka kwah ban ïoh jingshai bad ba ha kano ka nongrim ïa ki kali kit mrad hap ban leh entry da kaba bynrap ba katkum ka jingïoh jingtip ka seng pat kam shym la don satia kano ka jingkhmih bniah ïa ki kot ki sla jong ki kali ba ki shim pisa, hynrei tang ka jingshim ïa ki number phone jong ki nongñiah kali. U la pyntip ruh ba ka jingkhrong pisa ka long T.4 hajar ïa ki kali pick-up katba ïa ki trok pat ka dor ka long T.15 hajar.
Utei u nongïalam ka seng u la pynpaw ruh ïa ka jingsngewkhia ba lada ka long ha kane ka rukom, ka jingma kaba khraw ka ap ïa ki nongbam doh ha ka Jylla, lada ki kali kiba kit da ki mrad kiba don jingpang bad kiba ïap ruh, ki lah ban rung suk katba mon tang da kaba siew ïa kata ka bai entry.
U Bah Alfondbirth u la ïathuh ruh ba ka seng kala ju dawa na ka por sha ka por na ka Sorkar Jylla ba ka dei ban buh noh ïa ki jaka khmih bniah da ka tnad Veterinary ïa ki mrad bam doh kiba rung sha ka Jylla, hynrei ïa kane ka jingdawa, ka Sorkar kam pat pyntreikam satia.
Halor kane ka bynta, u la ong ba ka seng kan ïai bteng ban trei bad kyrshan ïa ki samla bad ki nongrep ba kin lah ban ïeng ha la ki jong ki kjat. U la kynnoh ruh ba ki don katto katne ki kynhun kiba pyrshang ban khanglad bad pynjynjar ïa ki nongrep bad ki samla ka Jylla, hynrei ka seng kan ïai buddien ïa kane ka kam bad ha kine ki khyndiat sngi ban sa wan, kan sa leit ruh ban kynduh ïa u Myntri ba dei khmih ban ïoh jingshai halor kane ka jingkhrong pisa be-aiñ ha Byrnihat.
